Ózbekstan Respublikası sırtqı isler ministri Baxtiyor Saidov óz jumısın juwmaqlap atırǵan Yaponiya hám Palestinanıń mámleketimizdegi Ayrıqsha hám tolıq huqıqlı elshileri Takoshi Xatori hám Javod Muhammad Avod penen ushırasıw ótkerdi. Bul haqqında SIM baspasóz xızmeti xabar berdi. Yaponiyalı diplomat penen sóylesiw waqtında Ózbekstan – Yaponiya strategiyalıq sherikligi izbe-iz rawajlanıp atırǵanı, sawda-ekonomikalıq, investiciyalıq, bilimlendiriw hám mádeniyat tarawlarında ámeliy birge islesiw kólemi keńeyip atırǵanı atap ótildi. Ministr elshige eki tárepleme birge islesiwdi bekkemlewge qaratılǵan jumısı ushın minnetdarshılıq bildirdi.

Esletip ótemiz, Takoshi Xatori 2023-jıl 12-aprelde Ózbekstan Respublikası Prezidentine isenim jarlıǵın tapsırǵan edi. Palestina elshisi Javod Muhammad Avod penen ushırasıwda mámleketimiz sırtqı siyasat uyımınıń basshısı elshiniń Ózbekstan – Palestina qatnasıqların rawajlandırıw, eki mámleket xalıqları arasındaǵı doslıqtı tereńlestiriwge qosqan úlesin ayrıqsha atap ótti.
B.Saidov Ózbekstan BMShtıń tiyisli rezolyuciyası sheńberinde “eki xalıq ushın eki mámleket” principin izbe-iz qollap-quwatlaytuǵının atap ótti.
Ministr diplomatlarǵa aldaǵı kásiplik jumıslarında tabıslar tiledi.

A.Alimova, ÓzA