Bizge belgili, “WikiMarafon” Jaslar isleri agentligi hám Jas dóretiwshiler keńesi tárepinen ózbek tilindegi vikipediyanı rawajlandırıwǵa qaratılǵan joybar bolıp, onda ózbek tilindegi vikipediyanı bayıtıw arqalı dúnya júzilik internet tarmaǵında ózbek tiline baylanıslı maǵlıwmatlardı kóbeytiw maqset etilgen.

Usı kúnlerde Jaslar isleri agentligi, ”Asaxiy Books” hám “WikiMarafon” birgelikte kitapqumar jaslar ushın jańa joybardı jolǵa qoydı.
Endi jaslar usı joybar arqalı “WikiKitob” tańlawında qatnasıp kitaplar toplamınan birin jeńip alıw imkaniyatına iye boladı. Bul, ózbek tilindegi vikipediya sapasın arttırıw, kitapqumarlıqqa qızıǵıwshılıǵı joqarı bolǵan jaslardı qollap-quwatlawǵa qaratılǵan sociallıq joybar bolıp esaplanadı.
Bul tańlawdıń tiykarǵı maqseti student hám oqıwshılar arasında ruwxıy-aǵartıwshılıq hám tárbiyalıq jumıslardıń nátiyjeliligin arttırıw, sonday-aq, olardıń sabaqtan bos waqıtların mazmunlı shólkemlestiriw, kitapqumarlıq mádeniyatın arttırıw hám kitap oqıwdı keńnen úgit-násiyatlaw, jaslardı óziniń erkin pikirine iye, olyaw sheńberi keń etip tárbiyalaw hám olardı qollap-quwatlawdan ibarat.
– Bul tańlaw student hám oqıwshılardıń kitap oqıwǵa bolǵan qızıǵıwshılıǵın jáne de arttırıwǵa xızmet etedi, – dedi Jaslar isleri agentligi “WikiMarafon” joybarınıń basshısı Shohjahon Sobirov. – Sonday-aq, tańlawdan jaslardıń sóz baylıǵın keńeytiw, sociallıq belsendiligin hám millet táǵdirine baylanıslılıǵın arttırıw, jaslardı watansúyiwshilik ruwxında tárbiyalaw sıyaqlı wazıypalar gózlengen.
Sonıń menen birge, ádebiy ortalıqtıń qáliplesiwine erisiw, jaslardıń sanasında Watanımız tariyxı, milliy hám ulıwmainsanıylıq qádiriyatlar, jámiyetlik turmıs haqqındaǵı túsinik hám bilim-kónlikpelerin bunnan bılay da arttırıwǵa áhmiyet qaratıladı.
Bul arqalı ózbek hám jáhán ádebiyatınıń saylandı úlgilerin keńnen úgit-násiyatlaw, jaslar arasında kitapqumarlıq mádeniyatın arttırıw, Ózbekshe vikipediya arqalı ádebiy bilimlerdi bekkemlew hám sanlı ruwxıylıqtı rawajlandırıw eń tiykarǵı maqset bolıp esaplanadı.
Usı jerde tańlawdı ótkeriw tártibi de joqarıdaǵı normalar tiykarında rejelestirilgen.
Tańlaw shólkemlestiriw toparı tárepinen bir basqıshta, onlayn formatta shólkemlestiriledi. Tańlaw 10-oktyabrden 15-oktyabrge shekem dawam etip, nátiyjeler 17-oktyabrge shekem járiyalanadı. Bul tańlaw jeke tártiptegi jarıs bolıp, onda qatnasıw ushın talabanlar @WikiTanlov_bot arqalı dizimnen ótedi.
Qatnasıwshılar telegram bot arqalı belgilengen tártipte dizimnen ótkennen soń, arnawlı ayna arqalı 40 testti sheshiwi kerek. Testler Ózbekshe Vikipediyada bar bolǵan kitaplarǵa tiyisli maqalalar boyınsha dúziledi. Testlerdi sheshiw ushın ulıwma 60 minut waqıt beriledi.
Telegram bot arqalı belgilengen tártipte dizimnen ótken qatnasıwshılar bot usınatuǵın arnawlı siltemeni doslarına bólistiriw arqalı tańlawdı úgit-násiyatlaw boyınsha arnawlı tańlawda qatnasıwı múmkin boladı.
Onda qatnasıwshılarǵa hár bir mirát etken dostı ushın 1 referal ball beriledi. Tańlawdıń test nátiyjeleri boyınsha qatnasıwshılardıń nátiyjeleri teń kelip qalǵan jaǵdayda, testti orınlap bolǵan waqıtqa qaraladı. Qosımsha nátiyjeleri joqarı bolǵan qatnasıwshıǵa ústinlik beriledi.
Tańlawdıń juwmaqlawshı nátiyjeleri 2 kún múddette qatnasıwshılarǵa málim etiledi.
Sonıń menen birge, tańlaw dawamında qatnasıwshınıń eki yamasa onnan artıq akkauntlardan qatnasıp atırǵanı anıqlansa, tańlawdan shetletiledi hám nátiyjesi biykarlanadı.
Tańlaw sońında jeńimpazlar kitaplar toplamı menen sıylıqlanadı. Tańlawdıń saylap alıw basqıshında test islegen hám final basqıshında qatnasıp, joqarı orınlardı iyeley almaǵan barlıq qatnasıwshılar nátiyjesine qaramastan elektron sertifikat penen sıylıqlanadı.
Juwmaqlawshı qaǵıydalar sonnan ibarat, tańlaw dawamında shólkemlestiriwshiler qatnasıwshınıń shaxsın tastıyıqlawshı hújjetin kórsetiwin talap etiw (onlayn jiberiw) hám joqarı orındı iyelegen qatnasıwshılardıń nátiyjelerine gúman payda bolǵanda, olar menen videochat yamasa telefon arqalı qosımsha soraw-juwap ótkeriw wákilligine iye.

Gulnoza Boboeva, ÓzA