Oliy Majlis Nızamshılıq palatasınıń gezektegi “Húkimet saatı”nda jasalma intellekt texnologiyaların rawajlandırıw strategiyası sheńberinde ámelge asırılıp atırǵan jumıslar boyınsha sanlı texnologiyalar ministri Sherzod Shermatovtıń málimlemesi tıńlanıp, deputatlar tarawǵa baylanıslı bir qatar sorawlar menen ministrge múrájat etti.

Muhammadjon Valiev, deputat:
– Búgingi kúnde hár bir tarawda jasalma intellekt texnologiyalarınan paydalanıwǵa ayrıqsha áhmiyet qaratılmaqta. Atap aytqanda, bilimlendiriw tarawında oqıwshılardıń shıǵarma hám bayanatlar jazıwda jasalma intellektten paydalanıwı qay dárejede nátiyje beredi? Bul baǵdarda Mektep hám mektepke shekemgi bilimlendiriw ministrligi menen birgelikte qanday jumıslar alıp barılmaqta?
Sherzod Shermatov, sanlı texnologiyalar ministri:
– Álbette, jasalma intellekt texnologiyaları járdeminde alınǵan ilim menen tábiyǵıy túrde ózi oylap, ózi úyrenip alınǵan ilim parıq qıladı. Bilimlendiriwde jasalma intellektten paydalanıwdıń nátiyjeliligi ilimiy jaqtan ele úyrenilmegen. Bul másele qánigeler tárepinen ilimiy kózqarastan úyreniliwi kerek. Álbette, bul baǵdarda ministrlik penen belgili jumıslar ámelge asırılmaqta. Sonıń menen birge, zaman menen teń bolıw, zamanagóy texnologiyalardıń qáwip-qáterlerinen jıraq bolǵan halda paydalanıw da zárúr.
Dildora Kamolova, deputat:
– Búgin ekologiyalıq qáwip-qáterler qáwpi artqan bir waqıtta mámleket jasalma intellektti ekologiyalıq siyasatqa integraciyalaw procesinen shette tura almaydı. Ulıwma, ekologiya hám qorshaǵan ortalıqtı qorǵaw tarawında jasalma intellektke tiykarlanǵan qanday joybarlardı ámelge asırıw rejelestirilgen?
Sherzod Shermatov:
– Ekologiyanı saqlaw tarawında tek ǵana jasalma intellekt emes, al sanlastırıw baǵdarında bir qatar joybarlarımız bar. Máselen, ekologiyaǵa zıyan jetkeriwi múmkin bolǵan kóplegen jaǵdaylar elektron húkimetti engiziw, mámleketlik xızmetlerdi yamasa bank xızmetlerin onlayn tárizde kórsetiw arqalı saplastırılmaqta. Aytayıq, mámleketlik xızmetlerden paydalanıw ushın transportta barıw arqalı atmosferaǵa záhárli elementler shıǵarılǵan bolsa, endi bunday háreketlerge zárúrlik qalmadı. Bunnan tısqarı, qaǵaz jumsalıwı keskin qısqartıldı.
Sonday-aq, “Jasıl mákan” sheńberinde egilgen nállerdiń qay dárejede kógergenin, olardı tallaw, pasportlastırıw, kosmoslıq qural yamasa dronlar arqalı jasıl aymaqlardıń qay dárejede artıp yamasa kóbeyip atırǵanın qadaǵalaw imkaniyatları jaratıldı.
Bunnan tısqarı, ǵálleden bosaǵan atızlardı jaǵıw jaǵdayları boyınsha óz aldına portal jaratılǵanı nátiyjesinde qaysı aymaqta, qansha maydan órtegeni sputnik arqalı anıqlanıp, tallaw imkaniyatı payda boldı. Nátiyjede ǵálle maydanların órtew jaǵdayları ótken jılı menen salıstırǵanda 30 procentten artıq azayǵanın kóriw múmkin.
Ulıwma, ekologiya tarawında jáne bir birgeliktegi joybarlardı ámelge asırıw rejelestirilgen.

Muhtarama Komilova, ÓzA