Tashkenttegi Insan huqıqları úyinde Rossiya ilimpazlarınıń qálemine tiyisli “Ótmishten keleshekke qaray: zamanagóy dúnyada insan huqıqları” atamasındaǵı monografiyanıń prezentaciyası bolıp ótti.

Bul shıǵarma Rossiya mámleketlik gumanitarlıq universitetiniń Miyras hám zamanagóy jámiyet institutı tárepinen basıp shıǵarılǵan.
Prezentaciya Rossiya Federaciyası Prezidentiniń keńesgóyi, Prezident janındaǵı Puqaralıq jámiyetin rawajlandırıw hám insan huqıqları boyınsha keńestiń baslıǵı Valeriy Fadeev basshılıǵındaǵı delegaciyanıń mámleketimizge saparı sheńberinde ótkerildi.
Prezentaciyada hár eki mámlekettiń jetekshi mámleketlik hám ilimiy ǵayratkerleri, mámleketlik uyımlar, akademiyalıq toparlar hám insan huqıqları shólkemleriniń wákilleri oflayn tárizde, Áliysher Nawayı atındaǵı Ózbekstan Milliy kitapxanası hám wálayat oraylarındaǵı málimleme-kitapxana oraylarınıń xızmetkerleri onlayn tárizde qatnastı.
Insan huqıqları boyınsha Ózbekstan Respublikası Milliy orayınıń direktorı Akmal Saidov huqıqıy sana hám huqıqıy mádeniyattı arttırıwda yuridikalıq ádebiyattıń ornı oǵada áhmiyetli ekenin atap ótti. Insan huqıqları úyinde “Rossiya hám insan huqıqları” múyeshi ashılǵanın járiyaladı.
Bul múyesh Rossiya Federaciyası Prezidenti janındaǵı Puqaralıq jámiyetin rawajlandırıw hám insan huqıqları boyınsha keńes, Rossiya Federaciyasınıń Insan huqıqları boyınsha wákili, Patris Lumumba atındaǵı Rossiya xalıqlar doslıǵı universiteti Yuridikalıq institutı sıyaqlı shólkemler hám mákemeler usınǵan kitaplar esabınan shólkemlestirildi.
Rossiya Prezidentiniń keńesgóyi Valeriy Fadeevtiń atap ótkenindey, bul baslama Rossiyanıń huqıq hám erkinliklerdi qorǵaw sisteması haqqındaǵı bilimlerdi tarqatıw, sonday-aq, kásiplik baylanıslar hám mámleketleraralıq insan huqıqları sóylesiwin bekkemlewge qaratılǵan. Búgingi kúnde insan huqıqları hám erkinlikleri dodalanıwın bir ǵana dástúr yamasa ideologiya sheńberi menen sheklep bolmaydı – tez ózgerip atırǵan dúnyada rawajlanıwdıń jańa jolların usınıs ete alatuǵın keń kólemli civilizaciyalar aralıq sóylesiw zárúr.
Shıǵıp sóylegenler monografiya fundamental izertlew esaplanatuǵının atap ótti. Kitapta insan huqıqları ideyaları Rossiya jámiyetiniń dástúriy qádiriyatlar sistemasına qalay kirip barǵanı, basqa huqıqıy hám mádeniy dástúrlerge salıstırǵanda qalay rawajlanıp atırǵanı hám global mashqalalar sharayatında sociallıq huqıqlar qanshelli áhmiyetke iye ekeni ilimiy, teoriyalıq hám ámeliy jaqtan tereń tallanǵan.
Prezentaciyada eki mámleket arasındaǵı sóylesiwdi dawam ettiriw hám jańa basqıshqa kóteriw áhmiyetli ekenligine itibar qaratıldı. Gumanitarlıq tarawdaǵı birgeliktegi joybarlardıń áhmiyeti ayrıqsha atap ótildi.
Prezentaciya sheńberinde delegaciya aǵzalarına Insan huqıqları boyınsha Ózbekstan Respublikası Milliy orayı tárepinen basıp shıǵarılǵan jańa kitaplar, qollanba hám jurnallar usınıs etildi.

Norgul ABDURAIMOVA,
ÓzA