Evropa parlamentinde “Ózbekstan hám Evropa Awqamı: demokratiyalıq reformalardı hám gender teńlikti alǵa qoyıwda parlamentleraralıq sóylesiwdiń roli” atamasında dógerek sáwbeti bolıp ótti.

Ilajda Ózbekstan Respublikası Oliy Majlisi Senatınıń Qorǵanıw hám qáwipsizlik máseleleri komitetiniń baslıǵı Qutbiddin Burxonov basshılıǵındaǵı Ózbekstan delegaciyası qatnastı.
Ilajda keyingi jılları Ózbekstan hám Evropa Awqamı arasındaǵı baylanıslar jedel rawajlanıp, strategiyalıq sheriklik dárejesine kóterilgeni atap ótildi.
Atap aytqanda, 2025-jıl aprel ayında Samarqandta ótkerilgen “Oraylıq Aziya – Evropa Awqamı” birinshi sammiti óz-ara isenimli sóylesiwdi jáne de bekkemlep, birge islesiwdiń jańa baǵdarların ashıp berdi.
Bul processte parlamentleraralıq sóylesiw áhmiyetli orın iyelep atırǵanı, nızamshılıq boyınsha tájiriybe almasıw, reformalardı qollap-quwatlaw hám xalıqlar arasında óz-ara túsinisiwdi kúsheytiwge xızmet etip atırǵanı ayrıqsha atap ótildi.
Dógerek sáwbeti dawamında insan huqıqların qorǵaw, puqaralıq jámiyetin qollap-quwatlaw, jaslar siyasatı hám hayal-qızlardıń jámiyetlik-siyasiy processtegi qatnasın keńeytiw máseleleri hár tárepleme dodalandı.
Ózbekstanda 2030-jılǵa shekem mólsherlengen gender teńlik strategiyasınıń qabıl etilgeni, hayal-qızlardıń siyasiy, ekonomikalıq hám sociallıq turmıstaǵı roli barǵan sayın artıp atırǵanı atap ótildi. Hayal-qızlardıń parlament, basqarıw, bilimlendiriw hám isbilermenlik tarawlarındaǵı belsendiligi mısal etip keltirildi.
Ilaj qatnasıwshıları Jańa Ózbekstannıń rawajlanıw strategiyasında óz kórinisin tapqan demokratiyalıq reformalardı tereńlestiriw, gender teńlikti bekkemlew, hayal-qızlardıń huqıqları menen imkaniyatların keńeytiw, reformalardı qollap-quwatlawda parlamentleraralıq sóylesiwdiń rolin kúsheytiw, Ózbekstan hám Evropa Awqamı arasında keńeytilgen sheriklik hám birge islesiw haqqındaǵı kelisimniń perspektivalarına ayrıqsha itibar qarattı.

N.Abduraimova, ÓzA