Ózbekstanda 1-oktyabrden kúshke kiretuǵın nızamshılıqtaǵı ózgerisler haqqında maǵlıwmat beremiz.

“Shıraylı” mámleketlik nomer belgileriniń aukcion sawdaları toqtatıladı
Ministrler Kabinetiniń 4-sentyabrdegi qararına muwapıq, “Ózbekstan Respublikalıq tovar-shiyki zat birjası” 2025-jıl 1-oktyabrden baslap “shıraylı” mámleketlik nomer belgileriniń aukcion sawdaların toqtatadı.
“Jasıl mákan” platformasında ashıq-aydınlıq támiyinlenedi
“Jasıl mákan” ulıwma milliy joybarın ámelge asırıwda jámiyetshiliktiń qatnasın arttırıw, “Jasıl mákan” platformasında ashıq-aydınlıqtı támiyinlewge qaratılǵan tómendegi mexanizmler engiziledi, sonıń ishinde:
xalıqtıń baslaması menen terek egiliwi múmkin bolǵan anıq aymaq, suw támiynatı, keyin ala tárbiyalaw imkaniyatı hám tereklerdiń túrlerin kórsetiw;
“Jasıl mákan” joybarına Mámleketlik byudjet qarjılarınan ámelge asırılatuǵın jumıslar haqqındaǵı maǵlıwmatlardı jámiyetshilikke “Hár bir tıyın jumsalıwın baqlaw” principi tiykarında onlayn jetkeriw.
Skuter hám moped aydaw ushın aydawshılıq gúwalıǵı májbúriy boladı
Endi moped hám skuter aydawshıları ushın jańa qaǵıyda kúshke kiredi – olardı basqarıw ushın aydawshılıq gúwalıǵı talap etiledi. Skuter yamasa mopedti dizimnen ótkeriw bahası 3,7 BEM (1 525 400 sum) etip belgilengen. Oqıw kursları bolsa 2 million sumǵa shekem. Gúwalıq alıw ushın mámleketlik bajı – 288 400 sumdı quraydı. Nomer alıw BEMnıń 1,5 esesi – 618 mıń sum. Onda ulıwma qárejet derlik 4,5 million sumnan artpaqta.
Mayıplıǵı bolǵan shaxslar ushın pensiyalar avtomat tárizde tayınlanadı
1-oktyabrden baslap Xalıq bankinde pensiyalardı naq túrde beriwde Face-ID biometrikalıq identifikaciya hám elektron sanlı qoltańbalardan paydalanıladı. Tólem alıwshılar tólem vedomostlarına planshette elektron formada qol qoyıwı múmkin boladı. Ádillik ministrligi Pensiya qorı hám Xalıq bankiniń elektron sorawına bola biometrikalıq identifikaciyalaw ushın maǵlıwmatlardı usınadı. Mámleketlik xızmetkerlerdiń xızmet saparları ushın birden-bir modul jolǵa qoyıladı.
Nızamshılıqqa bola, mámleketlik xızmetkerlerdiń sırt elge hám ishki xızmet saparların shólkemlestiriw, esabın júrgiziw hám tallawın alıp barıw “hrm.argos.uz” elektron sisteması quramındaǵı “Xızmet saparı” birden-bir moduli arqalı ámelge asırıladı.
Ayırım finanslıq járdemler sociallıq karta arqalı ajıratıladı
Ministrler Kabinetiniń 11-mart kúngi qararı menen Kámbaǵallıqtı qısqartıw mámleketlik maqsetli qorınıń jumısın shólkemlestiriw tártibi tastıyıqlanǵan edi. Qararǵa bola, 2025-jıldıń 1-oktyabrinen qor qarjıları esabınan puqaralarǵa naq pul túrinde beriletuǵın qarjılar basqıshpa-basqısh sociallıq karta arqalı beriledi.

ÓzA