Qaraózek rayonında mámleketimizdiń erteńgi keleshegi bolǵan kámil insanlardı tárbiyalap jetilistiriwge óziniń barlıq ómirin baǵıshlaǵan muǵallimlerimiz benen qádirli ustazlarımızdıń «1-oktyabr – Muǵallimler hám ustazlar kúni» ulıwmaxalıqlıq bayramı keń túrde belgilendi.

Bayram saltanatına rayon basshıları, bilimlendiriw xızmetkerleri, nuranıy muǵallimler hám jaslar qatnastı.
Onda rayon hákimi A. Baymuratov hám basqalar shıǵıp sóylep, ózleriniń barlıq ómiri, qálbindegi nurı hám mehrin balalarǵa baǵıshlaǵan, olarǵa ilim-bilim, óner sırların úyretip, xalqımızdıń izzet-húrmetine, sheksiz alǵısına miyasar bolǵan ustazlarımızdı kásiplik bayramları menen qutlıqladı.
Sonday-aq, rayon hákimi nuranıy ustazlardıń da miynetlerin atap ótip, «Mehnat shuhratı» ordeni iyesi G.Orazımbetovanıń is tájiriybesin mekteplerde keńnen en jaydırıw zárúrligine toqtap ótti.
Ilajda tarawda joqarı nátiyjelerge erisken bir qatar tájiriybeli muǵallimlerge rayon hákimliginiń Húrmet jarlıqları, Ózbekstan hám Qaraqalpaqstan xalıq bilimlendiriw aǵlası kókirek belgileri menen estelik sawǵaları tapsırıldı.
Bayram keshesi rayonlıq mádeniyat bólimi xızmetkerleri tárepinen tayarlanǵan yoshlı koncert baǵdarlaması menen kewilli dawam etti.

Adilbay Orazov,
Qaraqalpaqstan xabar agentligi sholıwshısı