Úlkemizge gúz máwsimi kirip keliwi menen hawa-rayı salqın tartıp xalıktıń ıssılıkka bolǵan talabı arta baslaydı. Búgingi kúni tutınıwshılarǵa úzliksiz tábiyǵıy gaz jetkerip beriwde artıqsha mashqalalardı boldırmaw maqsetinde, taraw xızmetkerleri baslı dıqqat-itibardı gaz tarmaqların gúzgi-qısqı máwsimge tayarlaw jumıslarına qaratpaqta.

Házirgi waqıtta respublikamızdıń qala hám rayonlarında gaz támiynatı menen baylanıslı aymaqlar úyrenip shıǵılıp, sol orınlardaǵı gaz tarmaqların ońlaw hám rekonstrukciyalaw jumısları belgilengen reje tiykarında alıp barılmaqta.
Bul baǵdarda Ellikqala rayonında da bir qatar unamlı isler ámelge asırılmaqta. Atap aytqanda, rayon boyınsha 15 579 jeke xojalıq hám 274 kótere tutınıwshı tábiyǵıy gaz benen támiyinlengen. Gaz támiynatı bólimi tárepinen gúzgi-qısqı aylarda tutınıwshılardı máwsimnen shıǵınsız alıp shıǵıwdıń barlıq ilajları kórilmekte.
-2025-2026-jıldıń gúzgi-qısqı dáwirine tayarlıq kóriw maqsetinde rejede belgilengen 1,2 km gaz tarmaqların rekonstrukciyalaw, 281 gaz bólistiriw punktlerin tekseriwden ótkeriw hám 2 danasına kapital ońlaw jumısları, 60 km jer ústi gaz tarmaqların hám 146,2 km jer astı gaz tarmaqların joqarı basım astında sınaw, 40 km gaz tarmaqların boyaw jumısları juwmaqlandı,-deydi Ellikkala rayonlık gaz tamiynatı bóliminiń baslıǵı Zafar Abdullaev.-Bunıń nátiyjesinde 695 xojalıqtıń gaz támiynatı jaqsılanıwına erisildi.
Álbette, gaz tarmaqların aldımızdaǵı gúzgi-qısqı máwsimge puqta tayarlaw, keshiktirip bolmaytuǵın áhmiyetli wazıypa esaplanadı. Solay eken taraw qánigeleri tárepinen alıp barılıp atırǵan bunday unamlı jumıslar, óz gezeginde tutınıwshılardı turaqlı tábiyǵıy gaz benen támiyinlewde óziniń unamlı nátiyjesin bereri sózsiz.

Adilbay Orazov,
Qaraqalpaqstan xabar agentligi sholıwshısı