Prezident Shavkat Mirziyoev Namangan qalasında 30 dan aslam abıraylı shólkem hám 200 ge shamalas xalıqaralıq ekspertlerdiń qatnasıwındaǵı “Kámbaǵallıqtan abadanlıqqa qaray” xalıqaralıq forumınıń ashılıwında shıǵıp sóylemekte.

Mámleketimiz basshısı elimizde kámbaǵallıqtı qısqartıw boyınsha úshinshi márte ótkerilip atırǵan xalıqaralıq ánjuman qatnasıwshıların qızǵın qutlıqladı. Ilajda qatnasıp atırǵan Islam rawajlanıw bankiniń prezidenti Muhammad Al-Jassir, Aziya rawajlanıw bankiniń vice-prezidenti Inmin Yang, Yaponiya xalıqaralıq birge islesiw agentliginiń bas vice-prezidenti Sachiko Imoto; Birlesken Milletler Shólkeminiń Oraylıq Aziya boyınsha arnawlı wákili Kaxa Imnadze, Jáhán bankiniń kámbaǵallıqtı qısqartıw boyınsha global direktorı Luis Felipe Lopes-Kalva hám barlıq miymanlarǵa minnetdarshılıq bildirdi.
Prezidentimiz insaniyat aqıbetlerin aldınnan aytıp bolmaytuǵın oǵada keskin hám quramalı dáwirdi basınan ótkerip atırǵanın atap ótti. Dúnyada geosiyasiy, ekonomikalıq hám sociallıq turaqsızlıq barǵan sayın artıp barmaqta. Jer júzinde baqlanıp atırǵan klimat ózgerisleri, suw jetispewshiligi hám pandemiyalar sebepli awır hám mashaqatlı sınaqlar payda bolmaqta.
2015-jıldan berli global ekonomikalıq ósiw tezligi ortasha 3 procentti qurap, aldınǵı on jıllıqqa salıstırǵanda tómenledi. Aqıbetinde, eger bes jıl aldın dúnyada 650 million xalıq kámbaǵallıqta jasaǵan bolsa, búgin olardıń sanı 800 millionnan astı.
– Bul jaǵday barlıq mámleketler, xalıqaralıq shólkemler, ulıwma, dúnya jámiyetshiligi aldına jańa hám áhmiyetli wazıypalardı qoyıp, olarǵa sheshim tabıw boyınsha operativ qararlar qabıl etiwdi talap etpekte,-dedi Prezidentimiz.

ÓzA