Mámleketimiz basshısı Namangan qalasında mámleketlik-jeke menshik sheriklik tiykarında shólkemlestirilgen “Firdavs” kúndizgi tárbiya orayın barıp kórdi.

Mámleketimiz Konstituciyası, xalıqtı sociallıq qorǵaw strategiyası tiykarında insandı qádirlew kólemi keńeydi, bul tarawdaǵı xızmetler mútájlerge jaqınlastırılmaqta. Atap aytqanda, usı jıldıń mart ayınan baslap Ózbekstanda mayıplıǵı bolǵan balalar ushın kúndizgi tárbiya xızmeti jolǵa qoyıldı. Bunday joybarlar jeke menshik sheriklik tiykarında, mámleket tárepinen subsidiya arqalı ámelge asırılmaqta.
Isbilermen Sayyora Qosimova tárepinen shólkemlestirilgen “Firdavs” kúndizgi tárbiya orayı solardan biri. Oray 36 orınǵa mólsherlengen bolıp, arnawlı bilimlendiriw hám reabilitaciya xızmetleri kórsetiledi. Balalar kún dawamında toǵız saatlıq individual oqıw-trening baǵdarlamaları menen qamtıp alınadı. Sabaqlardı tájiriybeli nevropatolog, defektolog, surdolog, audiolog, pedagog hám psixologlar alıp baradı.
Bul xızmetten paydalanıp atırǵan analar perzentlerine mehiri hám ǵamxorlıǵı ushın Prezidentimizge minnetdarshılıq bildirdi. Olardıń aytıwınsha, aldın bunday balalar tek úyde otıratuǵın, jámiyetten ajıralıp qalatuǵın edi. Jańa sociallıq qorǵaw sisteması sebepli endi olar da “jarıqlıqqa” shıǵıp atır. Mayıplıǵı bolǵan balalar inklyuziv bilimlendiriwge, qızıqlı sabaq hám shınıǵıwlarǵa tartılıp, turmıslıq kónlikpelerdi úyrenbekte. Bul mayıp perzenti bar shańaraqlar ushın oǵada úlken qollap-quwatlaw hám táselle bolıp esaplanadı.
Prezident elimizde hesh kim itibardan shette qalmaytuǵının, bunday sociallıq joybarlardıń kólemi keńeytiletuǵının atap ótti.
Mámleketimiz basshısı bul jerdegi “Faol hayotga qadam besh xizmat” juwapkershiligi sheklengen jámiyetiniń jumısı menen de tanıstı.
Oray usı jılı isbilermen Xosiyat Ortiqovanıń jeke qarjısı esabınan shólkemlestirilgen. Bul jerde ózgelerdiń kútimine mútáj shaxslar ushın zamanagóy qolaylıqlar, medicinalıq hám reabilitaciyalıq xızmetler jolǵa qoyılǵan. Oray 16 orınǵa mólsherlengen.
Bul jerde medicina qánigeleri tárepinen individual baǵdarlamalar tiykarında hár kúni 8 saatlıq shınıǵıw ótkeriledi. Olar adamlardıń densawlıǵın tiklew, funkcionallıq imkaniyatların arttırıw hám jámiyetlik turmısqa qaytarıwǵa járdem beredi.
Áhmiyetlisi, ótken dáwir dawamında ámelge asırılǵan emlewler nátiyje bere basladı. Atap aytqanda, segiz shaxstıń ózine-ózi xızmet kórsetiw dárejesi jaqsılandı, beswiniń shańaraq aǵzası jumısqa jaylastı.
“Jedel turmısqa qádem” baǵdarlaması hám kúndizgi tárbiya insanlarǵa salamat turmısqa qaytıw, shańaraqlarǵa bolsa ekonomikalıq hám sociallıq imkaniyatlardı arttırıw múmkinshiligin bermekte. Bul xızmetler arqalı tek ǵana nawqaslardıń ómirinde emes, al olardıń shańaraqlarında, jámiyette unamlı ózgerisler baqlanbaqta.
Bul tarawdaǵı mámleketlik-jeke menshik sheriklik baǵdarlamasına respublika boyınsha 600 isbilermen qosılǵan bolıp, olardıń 46 sı Namangan wálayatında jumıs alıp barmaqta. “Jedel turmısqa qádem” baǵdarlaması menen elimizdegi basqalardıń kútimine mútáj 24 mıń puqara, kúndizgi tárbiya xızmeti menen 3 mıńǵa shamalas mayıplıǵı bolǵan balalar qamtıp alınǵan.

ÓzA