Tashkent qalasında qılıshlasıw sportınıń sablya, shpaga hám rapira túrlerinen 17 jastaǵı er balalar hám qızlar arasında Aziya kubogi bellesiwleri bolıp ótti.

Onda Ózbekstan saylandı komandası quramında bir qatar sportshılarımız da qatnasıp, joqarı nátiyjelerdi qolǵa kirgizdi.
Atap aytqanda, qızlar arasında bolıp ótken bellesiwlerde Nargiza Utebaeva penen Nurxayat Qalniyazovalar, er balalar arasında Artur Begjanov, Alisher Kabulov hám Qoblan Kamalovlar barlıq qarsılasların jeńip shıǵıp, Aziya kubogi jeńimpazlarına aylandı hám altın medal menen sıylıqlandı.
-Bul jarıs jaslarımız ushın oǵada tabıslı keldi,-deydi saylandı komandamız treneri Dáwirbek Jiyemuratov.-Atap aytqanda, jeńimpaz sportshılarımızdan tısqarı Periyzat Maulenbergenova, Peruza Sherniyazova, Umida Rustamova, Sultan Ametbekov hám Alisher Jalǵasbaevlar qola medalların jeńip aldı. Aldaǵı waqıtları olardan bunnan da joqarı nátiyjelerdi kútip qalamız.
Jas sportshılarımızdı bul jarısqa Sárdar Nazarımbetov, Nazipa Otebaeva, Farxad Nawrızbaev, Pazılbek Genjebaev, Erbol Jumabaev , Jaqsımurat Bekmuratov hám Ámir Bekbergenovlar tayarladı.

Adilbay Orazov,
Qaraqalpaqstan xabar agentligi sholıwshısı.