Qaraqalpaqstan Respublikası Joqarǵı Keńesindegi Isbilermenler háreketi – Ózbekstan Liberal-demokratiyalıq partiyası frakciyasınıń gezektegi májilisi bolıp ótti.

Ilajda frakciya deputatları, Qaraqalpaqstan Respublikası Joqarǵı Keńesiniń Jergilikli hákimiyat wákillikli uyımları hám puqaralardıń ózin-ózi basqarıw uyımları jáne mámleketlik uyımlardıń ashıq-aydınlıǵın támiyinlew máseleleri boyınsha komitetiniń wákilleri, ÓzLiDePtiń respublikalıq hám aymaqlıq dárejedegi basshıları, sonday-aq, ǵalaba xabar quralları jáne qalalıq hám rayonlıq keńesleri apparatlarınıń wákilleri tikkeley jáne “Zoom” formatında qatnastı. Májiliste xalıqtıń turmısın jaqsılaw, jergilikli baslamalardı qollap-quwatlaw hám jámiyetlik siyasattı rawajlandırıwǵa qaratılǵan tórt tiykarǵı másele dodalandı.
Májiliste Qaraqalpaqstan Respublikası nızamlarına ózgerisler hám qosımshalar kirgiziw haqqındaǵı nızam joybarları kórip shıǵıldı. Jergilikli ózin-ózi basqarıw máseleleri komitetiniń baslıǵı Sh.Otemisov bayanat jasap, onda nızamshılıq bazasın regionnıń jańa sociallıq-ekonomikalıq mashqalaların esapqa alǵan halda beyimlestiriw zárúrligine tolıq toqtap ótti. Municipal rayonlardı óz imaratları menen támiyinlew máselesi de dodalandı. Beruniy rayonı hákimi I.Xidirov óziniń infrastrukturasına iye bolmaǵan máhállelerdi imaratlar menen támiyinlew boyınsha ámelge asırılıp atırǵan jumıslar haqqında esabat berdi. Bul wazıypanı ámelge asırıw sistemalı túrde alıp barılıp atırǵanı, ol basqarıwdıń sapasın jaqsılaw hám xalıqqa xızmet kórsetiwdiń qolaylıǵın arttırıw imkaniyatın beretuǵını atap ótildi.
Ózbekstan Respublikası Ministrler Kabinetiniń 2024-jıl 6-avgusttaǵı “Máhállelerde xalıqtıń mashqalaların anıqlaw sistemasın jetilistiriw haqqında”ǵı qararınıń orınlanıwına ayrıqsha itibar qaratıldı. Ózbekstan Máhálleler associaciyası Qaraqalpaqstan Respublikası basqarması baslıǵı S.Turmanov “Sanlı máhálle” platformasın – máhálleler dárejesinde sociallıq mashqalalardı monitoring hám tallawdıń birden-bir sistemasın engiziw procesi haqqında aytıp berdi. Onıń sózlerine bola, platforma álle qashan 34 mıńnan aslam jumıssızlardı qamtıp alǵan, puqaralardıń múrájatlarına jedel juwap beriw imkaniyatın beretuǵın keń kólemli maǵlıwmatlar toplanbaqta.
Ózbekstan Respublikası Prezidentiniń 2024-jıl 7-marttaǵı “Hayal-qızlar isbilermenligin qollap-quwatlawǵa baylanıslı qosımsha ilajlar haqqında”ǵı qararınıń orınlanıwı májilistiń eń áhmiyetli teması boldı. Qaraqalpaqstan Respublikası Ministrler Keńesi Shańaraq hám hayal-qızlar máseleleri boyınsha sekretariat baslıǵı B.Ayımbetova isbilermen hayal-qızlardı qollap-quwatlaw hám olardıń bántligin támiyinlew ilajları haqqında esabat berdi. Bántlikti támiyinlew hám kásip-ónerge oqıtıw baǵdarlamaların jedellestiriwge ayrıqsha itibar qaratıldı.
Májilis janlı pikirlesiw túrinde bolıp, onda qatnasıwshılar aymaqtıń áhmiyetli mashqalaları boyınsha pikir alıstı hám sorawlar berdi. Xalıqtı qollap-quwatlawǵa sistemalı qatnas jasaw, jergilikli basqarıw uyımları jumısınıń ashıq-aydınlıǵın hám nátiyjeliligin arttırıw, biznesti, ásirese, hayal-qızlar arasında turaqlı rawajlandırıw ushın sharayatlar jaratıw zárúr ekenligi atap ótildi. Dodalawlar juwmaǵında kórip shıǵılǵan máselelerdi bunnan bılay da nızamshılıqta bekkemlew hám orınlanıwın qadaǵalaw ushın Joqarǵı Keńestiń gezektegi sessiyasınıń kún tártibine kirgiziw haqqında qararlar qabıl etildi.
Respublikada hayal-qızlar isbilermenligin qollap-quwatlaw hám olardıń bántligin támiyinlew tarawındaǵı jetiskenlikler haqqındaǵı tolıq esabat májilistiń áhmiyetli bólegi boldı. 2025-jılǵı mámleketlik baǵdarlama sheńberinde 46 mıńnan aslam hayal-qızlardı jumıs penen támiyinlew rejelestirilgen bolıp, olardıń 63 procentten aslamı 2025-jıldıń may ayına shekem jumıs penen támiyinlengen. Túrli mámleketlik uyımlar hám kommerciyalıq bankler tárepinen isbilermen hayal-qızlarǵa kreditler ajıratılıp, finanslıq jaqtan qollap-quwatlanbaqta.
Tek ǵana 2025-jıldıń birinshi yarımında bankler tárepinen 660 tan aslam hayal-qızǵa 59 milliard sumnan artıq kepillikli kreditler ajıratıldı. Isbilermenler kónlikpeleri hám IT kompetenciyalardı rawajlandırıw boyınsha qánigelestirilgen baǵdarlamalar hayal-qzlardı kásip-ónerge oqıtıwǵa úlken úles qospaqta. Bul tarawdaǵı tayarlıq rejesiniń 100 procentke orınlanıwı menen tastıyıqlanadı. Jumıssızlıq dárejesi eń joqarı bolǵan saymaqlar, atap aytqanda, Beruniy hám Nókis rayonlarına ayrıqsha itibar qaratılıp, olarda hayal-qızlardıń mamanlıǵın arttırıw hám miynetke tartıw boyınsha maqsetli ilajlar ámelge asırılmaqta.
Qaraqalpaqstan Respublikası Joqarǵı Keńesindegi ÓzLiDeP frakciyasınıń májilisi aymaqtı sociallıq-ekonomikalıq rawajlandırıw, hayal-qızlardıń ekonomikadaǵı rolin kúsheytiw, jergilikli hákimiyat uyımlarınıń jumısına zamanagóy sanlı texnologiyalardı engiziw máselelerin dodalawda áhmiyetli maydanǵa aylandı.

Amangul ESEMURATOVA,
ÓzLiDeP Qaraqalpaqstan Respublikası Keńesi Jámiyetshilik penen baylanıslar, málimleme siyasatı hám ideologiyalıq isler bólimi baslıǵı