Usı jıldıń 28-avgust – 1-sentyabr kúnleri aralıǵında Qıtaydıń Shenyan qalasında sporttıń akademiyalıq eskek esiw túri boyınsha 19 hám 23 jastaǵı jaslar arasında Aziya chempionatı bolıp ótken edi.

Onda Ózbekstan saylandı komandası quramında respublikamız sportshılarınan qızlar arasında Aydana Smettulaeva altın, Nurila Abdualieva qola, erler arasında Babur Xaytbaev gúmis medallardı jeńip alǵan edi.
Taxtakópir rayonı hákimi Jambul Adilov negizi taxtakópirli bolǵan Aziya chempionı Aydana Smetullaeva hám onıń anası menen ushırasıp, jas sportshını qolǵa kirgizgen úlken tabısı menen qutlıqladı. Ushırasıwda rayon hákimligi tárepinen sportshıǵa Húrmet jarlıǵı, ata-anasına Minnetdarshılıq xatı tapsırıldı.
Maǵlıwmat ornında aytıp ótiw orınlı, Aydana Smetullaeva 2021-jıldan baslap Nókis Olimpiya hám paralimpiya sport túrlerine tayarlaw orayında bilim alıp kelmekte.
Ol 2022-jıldan baslap akademiyalıq eskek esiw boyınsha Ózbekstan Respublikası saylandı komandası aǵzası, xalıqaralıq dárejedegi sport sheberi bolıp tabıladı.
A.Smetullaeva respublikalıq hám xalıqaralıq kólemde ótkerilip atırǵan sport jarıslarında nátiyjeli qatnasıp, sporttıń akademiyalıq eskek esiw boyınsha perspektivalı sporshılardıń biri.
Atap aytqanda, taxtakópirli jas sportshı 2022-jılı Tashkent wálayatında ótkerilgen Ózbekstan chempionatı hám kuboginde altın, 2023-jılı Rossiya Federaciyası paytaxtı Moskva qalasında ótkerilgen «Moskva Regatası» xalıqaralıq turnirinde qola, 2023-jılı Tailand mámleketinde ótkerilgen Aziya chempionatında qola, 2024-jılı sentyabr ayında Qıtay mámleketinde ótkerilgen Aziya chempionatında altın, 2025-jılı «Moskva Regatası» xalıqaralıq turnirinde jáne qola, 2025-jıldıń avgust ayında Litva mámleketinde ótkerilgen Jáhán chempionatında gúmis, Qıtayda ótkerilgen Aziya chempionatında altın medallardı jeńip alıwǵa miyasar boldı.
Taxtakópir rayonı hákimligi tárepinen jas sportshıǵa kórsetilip atırǵan bunday itibar, onıń aldaǵı jarıslarda da joqarı nátiyjelerdi kórsetiwine ruwxıy demew boladı, dep isenemiz.

Adilbay Orazov,
Qaraqalpaqstan xabar agentligi sholıwshısı