Ózbekstan Respublikası Prezidenti Shavkat Mirziyoev 28-avgust kúni elimizde ámeliy sapar menen bolıp turǵan Amerika Qurama Shtatları Prezidentiniń global sheriklikler boyınsha arnawlı wákili Paolo Zampollidi qabılladı.

AQSh administraciyasınıń joqarı mártebeli wákili mámleketimiz basshısına Prezident Donald Tramptıń qızǵın sálemi hám Ózbekstan ǵárezsizligi kúni múnásibeti menen qutlıqlawın jetkerdi.
Ushırasıwda Ózbekstan menen AQSh arasındaǵı strategiyalıq sheriklik hám kóp táreplemeli birge islesiw qatnasıqların bunnan bılay da keńeytiw máseleleri hár tárepleme kórip shıǵıldı.
Hár qıylı dárejelerde nátiyjeli baylanıslar dawam etip atırǵanı ayrıqsha qanaatlanıwshılıq penen atap ótildi. Konstruktivlik siyasiy sóylesiw rawajlanbaqta, jedel parlamentleraralıq almasıwlar ámelge asırılmaqta. Ótken ayda Kongresste Ózbekstan kúni sheńberindegi ilajlar ótkerildi, bıyıl gúzde Keńeytilgen strategiyalıq sheriklik qarım-qatnasınıń birinshi májilisi bolıp ótedi.
Qáwipsizlik tarawında, terrorizm, ekstremizm hám nızamsız migraciyaǵa qarsı gúresiw baǵdarında nátiyjeli birge islesiw jolǵa qoyılǵan.
AQSh dástúriy túrde Ózbekstannıń áhmiyetli ekonomikalıq sherigi bolıp esaplanadı. 2024-jılı tovar almasıwdıń kólemi 15 procentke kóbeydi. Joybarlar portfeli 11 milliard dollardan artqan.
Usı jıldıń iyun ayında ótkerilgen Tashkent investiciya forumında AQShtıń 100 den aslam jetekshi kompaniyaları qatnastı.
Mineral resurslar, aviaciya, elektrotexnika, awıl xojalıǵı, sanlı texnologiyalar, qarjı, innovaciyalar, bilimlendiriw hám basqa da tiykarǵı baǵdarlarda kooperaciyalıq joybarlardı alǵa qoyıwǵa úlken potencial bar ekenligi atap ótildi.
“S5+1” formatı sheńberinde regionallıq birge islesiwdi rawajlandırıw áhmiyetli ekeni atap ótildi.
Bolajaq sóylesiwler hám birgeliktegi ilajlardıń rejesi de kórip shıǵıldı.

ÓzA