26-avgust – Ózbekstan hám YuNESKO arasında birge islesiw haqqındaǵı memorandumǵa qol qoyılǵan kún.
Tariyxtı úyrenbey, materiallıq hám ruwxıy miyrastı qásterlep saqlamastan bárkamal áwladtı qáliplestirip bolmaydı.

YuNESKO dúnya kóleminde mádeniy miyraslardı qásterlep saqlaw, zamanagóy bilimlerdi tarqatıw hám xalıqlar arasında óz-ara túsinisiwdi kúsheytiwge xızmet etedi. Bul Birlesken Milletler Shólkeminiń bilimlendiriw, ilim hám mádeniyat máseleleri boyınsha qánigelesken agentligi bolıp, 1945-jılı shólkemlestirilgen. Onıń tiykarǵı maqseti – xalıqaralıq birge islesiw arqalı bilimlendiriw, ilim hám mádeniyattı rawajlandırıw jáne tınıshlıqtı bekkemlew bolıp esaplanadı.
1995-jılı 26-avgust kúni Tashkent qalasında Ózbekstan hám YuNESKO arasında birge islesiw haqqında memorandumǵa qol qoyılǵan edi. Oǵan bola, bul hújjet Ózbekstandaǵı tariyxıy esteliklerdi xalıqaralıq kólemde tán alıw, bilimlendiriw, ilim hám mádeniyat baǵdarlarında birgeliktegi joybarlardı ámelge asırıw, Mádeniy miyrastı saqlaw hám úgit-násiyatlawda global kózqarastı támiyinlew hám birgeliktegi baǵdarlamalardı ámelge asırıwǵa tiykar boldı.
Sonıń ishinde, bul birge islesiw nátiyjesinde Samarqand, Buxara, Xiywa sıyaqlı qalalar YuNESKOnıń Pútkil jer júzilik miyrasınıń dizimine kirgizildi. YuNESKOnıń járdeminde Ózbekstanda kóplegen tariyxıy estelikler restavraciyalandı, ilimiy ekspediciyalar ótkerildi, bilimlendiriw joybarları jolǵa qoyıldı.
Bul bolsa Ózbekstannıń dúnya jámiyetshiliginde isenimli qádemler menen óziniń tariyxıy miyrasına bolǵan húrmetiniń úlgisi bolıp qaldı.

A.RUSTAMOV, ÓzAnıń xabarshısı