Tashkent fotosúwretler úyinde Ózbekstan Respublikası Mámleketlik ǵárezsiziliginiń 34 jıllıǵı múnásibeti menen “Eń ullı, eń áziz” dástúriy tańlawınıń súwretlew kórkem-óneri, foto hám dizayn baǵdarları boyınsha respublikalıq basqıshı sheńberindegi kórgizbeniń ashılıw máresimi bolıp ótti.

Bul ilaj Ózbekstan Respublikası Prezidentiniń 2025-jıl 10-iyuldegi “Ózbekstan Respublikası mámleketlik ǵárezsizliginiń otız tórt jıllıq bayramına tayarlıq kóriw hám onı ótkeriw haqqında”ǵı qararınıń orınlanıwın támiyinlew maqsetinde shólkemlestirildi hám elimizde ǵárezsizlik bayramın keńnen belgilewge baǵıshlanǵan áhmiyetli mádeniy- aǵartıwshılıq waqıyalardan biri boldı.
Tańlawda 40 avtor 410 nan aslam shıǵarma menen qatnastı. Tóreshiler aǵzaları tárepinen hár bir shıǵarma tereń úyrenilip, eń jaqsı jumıslardan kórgizbe shólkemlestirildi.
Kórgizbe ekspoziciyasında súwretlew kórkem óneri, fotografiya hám dizayn baǵdarında jaratılǵan shıǵarmalar kórsetilip, onda ǵárezsizliktiń mazmun-mánisi, milliy qádiriyatlarımız, xalqımızdıń dóretiwshilik hám miynet súygishlik ruwxı joqarı kórkemlik dárejede sáwlelendirildi.
– Ǵárezsizlik – xalqımızdıń eń ullı qádiriyatı, milliy ózlikti ańlaw hám keleshekke isenim menen qaraw dáregi, – dedi Ózbekstan Kórkem óner akademiyasınıń baslıǵı Akmal Nur. – Hár bir dóretiwshi óz shıǵarması arqalı ǵárezsizlikti, Watanǵa bolǵan muhabbattı, milliy maqtanısh hám qádiriyatlardı kórkemlik jaqtan sáwlelendirmekte. Bul – kórkem óner arqalı ǵárezsizlikti ulıǵlawdıń ayqın kórinisi.
Ǵárezsizlik xalqımızǵa jańalanıw, rawajlanıw hám dóretiwshilik jolın ashıp berdi. Búgin “Ózbekstan – 2030” strategiyası tiykarında ámelge asırılıp atırǵan reformalar, puqaralıq jámiyetiniń bekkemleniwi, xalqımızdıń ruwxıy rawajlanıwı ǵárezsizlik sebepli júzege shıqpaqta.
Bul kórgizbe kórkem óner arqalı ǵárezsizlik ideyasın tereń talqılap, jámiyetimizdiń estetikalıq oy-pikirin bayıtadı, Watanǵa muhabbat, milliy maqtanısh hám dóretiwshilik ruwxın jáne de joqarılatadı.
“Eń ullı, eń áziz” tańlawı dóretiwshilerimizdiń joqarı sheberligi, jańa kórkem izleniwleri hám ǵárezsizlik jıllarında erisilgen jetiskenliklerdi kórkem óner tilinde kórsetiwge xızmet etpekte.

Nazokat USMONOVA,
ÓzA