Jańa qarar

Prezidenttiń “Xalıqaralıq zamanagóy kórkem óner biennalesin joqarı dárejede ótkeriw ilajları haqqında”ǵı qararına bola, birinshi Buxara biennalesinde 14 mádeniy miyras obekti kórgizbe hám ilajlar, bilimlendiriw hám izertlew, dóretiwshilik hám óndiris processleri úylesken kreativ klasterge aylandırıladı.
Mámleketimiz tariyxında birinshi márte bul ánjuman sheńberinde 70 ten aslam zamanagóy joybarlar tanıstırıladı, olardıń hár biri Oraylıq Aziya hám pútkil dúnyadan keletuǵın jergilikli usta hám xudojnikler menen birgelikte joybarlastırılǵan.
Hújjetke muwapıq, dúnyaǵa belgili usta-dóretiwshiler tárepinen 60 tan aslam art obekt, sonıń ishinde, installyaciyalar jaratıw, olardan biennale ótkeriletuǵın orındı kórkemlep bezewde paydalanıw hám olardıń eń múnásiplerin dúnya boylap kórgizbelerde kórsetiw de belgilengen.
Bunnan tısqarı, biennale haqqında hújjetli film jaratıw, sonday-aq, onnan paydalanıp mámleketimizdiń turistlik potencialın úgit-násiyatlawǵa da ayrıqsha itibar qaratıladı.
Hár bir tamashagóy ilajlar dúrkininde qatnasıp, Ózbekstannıń bay mádeniy miyrası, qádiriyatları, eski-tariyxıy qalaları haqqında kóbirek maǵlıwmatlar aladı. Bul álbette, turistlerdiń elimizge bolǵan qızıǵıwshılıǵın jáne de arttıradı.
Qararda belgilengenindey, biennale arnawlı bilimlendiriw baǵdarlaması tiykarında xalıqaralıq dárejedegi kuratorlardı tayarlaw hám dúnyanıń jetekshi kórkem óner maydanlarında Ózbekstannıń atınan qatnasıwın támiyinlewge de xızmet etedi.

Behruz Xudoyberdiev,
ÓzAnıń xabarshısı