Elimizde kishi biznes hám jeke isbilermenlikti rawajlandırıw processleri izbe-iz dawam etpekte. Milliy statistika komitetiniń maǵlıwmatlarına bola, 2025-jıldıń birinshi yarımında respublikamızda 47 mıń 796 kishi isbilermenlik subekti shólkemlestirilgen. Bul sanlar mámlekette biznes júrgiziw imkaniyatlarınıń keńeyip atırǵanınan dárek beredi.

Sawda tarawı isbilermenlikte keń tarqalǵan baǵdarlardan biri bolıp esaplanadı hám onda 17 mıń 587 kishi isbilermenlik subekti shólkemlestirilgen. Bunday jumıs túrleri arasında usaqlap satıw hám kótere sawda, avtotransport quralları menen sawda islew sıyaqlı baǵdarlar bar.
Awıl xojalıǵı hám balıqshılıq boyınsha 6 mıń 183 kishi isbilermenlik subekti shólkemlestirildi. Bul taraw ekonomikada áhmiyetli orınǵa iye bolıp, ásirese, awıllıq jerlerde jasaytuǵın xalıq ushın tiykarǵı miynet hám dáramat dáregi bolıp esaplanadı. Awıl xojalıǵında kishi kárxanalar tiykarınan ıssıxana, sharwashılıq, qusshılıq hám balıqshılıq penen shuǵıllanbaqta.
Sanaat tarawı Ózbekstanda izbe-iz rawajlanıp atırǵan strategiyalıq tarawlardan biri bolıp, onda 2025-jıldıń 1-sheregi esabında 6 mıń 189 kárxana óz jumısın júrgizip kelmekte. Kishi sanaat subektleri tiykarınan qayta islew sanaatı, ónermentshilik, toqımashılıq, azıq-awqat ónimlerin islep shıǵarıw sıyaqlı baǵdarlarda jumıs alıp barmaqta.
Jasaw hám awqatlanıw boyınsha xızmetler tarawında 4 mıń 234 kishi biznes subektiniń shólkemlestiriliwi óz-ózinen turizm tarawınıń rawajlanıwı menen tıǵız baylanıslı. Bul tarawda miymanxanalar, kafe, restoranlar hám basqa da xızmetler jumıs alıp barmaqta. Xalıqtıń turmıs dárejesi artqan sayın xızmetler tarawı da keńeymekte.
Qurılıs tarawında 2 mıń 680 kishi isbilermenlik subektleri shólkemlestirildi. Ońlaw hám qurılıs jumıslarına bolǵan talap hám qurılıs materialların islep shıǵarıw hám jetkerip beriw bul tarawdaǵı iri joybarlardıń islep shıǵılıwına sebep bolmaqta.
Sanlı ekonomikaǵa ótiw menen birge málimleme hám baylanıs tarawında 1 mıń 763 kishi biznes subekti shólkemlestirildi. IT hám mobil qosımshalar jaratıwdı xoshametlew sheńberinde bul reformalar ámelge asırılmaqta.
Mámleketimizde eksport tarawınıń jıldan-jılǵa rawajlanıp atırǵanı hám onda logistika hám jetkerip beriw xızmetlerine talap artıp atırǵanı usı taraw isbilermenleri ushın imkaniyatlar jaratpaqta. Elektron kommerciyanıń keńeyiwi bul tarawǵa jańa imkaniyatlar alıp keldi. Keltirilgen statistikada 1 mıń 512 kishi isbilermenlik subektiniń shólkemlestirilgeni de tarawda alıp barılıp atırǵan keń kólemli jumıslardan dárek beredi.
Densawlıqtı saqlaw hám sociallıq xızmet kórsetiw tarawında 989 kishi isbilermenlik subekti shólkemlestirildi. Jeke menshik klinikalar, stomatologiya xızmetleri sıyaqlı baǵdarlar xalıq arasında talapqa iye bolıp, olardı kishi biznes wákilleri tabıslı rawajlandırmaqta.
Usı sıyaqlı basqa da tarawlarda da 6 mıń 659 kishi isbilermenlik subektleri shólkemlestirilgen bolıp, olarǵa bilimlendiriw, konsalting, kórkem óner hám mádeniyat sıyaqlı baǵdarlar kiredi.
Kishi biznes subektleriniń ekonomikadaǵı roli barǵan sayın artıp barmaqta. Eń kóp jumıs alıp barıp atırǵan tarawlar – sawda, awıl xojalıǵı, sanaat hám xızmet kórsetiw búgingi ekonomikalıq sharayatta eń qolaylı kiriw esiklerine iye bolǵan baǵdarlar bolıp esaplanadı. Házirgi waqıtta innovaciyalıq hám texnologiyalıq tarawlarda da ósiw pátleri baqlanbaqta. Bul bolsa keleshekte sanlı ekonomikanıń rawajlanıwında ayrıqsha áhmiyetke iye boladı.

Dildora DWSMATOVA
ÓzA