Ózbekstanda sanaattıń rawajlanıwın hám mineral resurslardan nátiyjeli paydalanıwdı támiyinlew maqsetinde gezektegi áhmiyetli qádem taslandı. “Ózbekstan texnologiyalıq metallar kombinatı” akcionerlik jámiyeti hám “Taw-kán hám geologiya tarawı xızmetkerleriniń mamanlıǵın arttırıw institutı” mámleketlik mákemesi arasında óz-ara birge islesiw haqqındaǵı kelisimge qol qoyıldı.

Bul kelisim sheńberinde sanaat ushın áhmiyetli minerallar baǵdarında laboratoriya qánigelerin hám joybar basshıların tayarlaw, olardıń bilim hám kónlikpelerin zamanagóy talaplarǵa sáykes túrde arttırıw rejelestirilgen. Sonday-aq, bilimlendiriw processlerine sırt elli ekspertler tartılıp, aldıńǵı tájiriybeler tiykarında ámeliy sabaqlar shólkemlestiriledi.
Baǵdarlamanıń tiykarǵı maqseti – qánigelerdiń mamanlıǵın arttırıw menen birge, mineral resurslar tarawında óndiris processleriniń nátiyjeliligin támiyinlew, innovaciyalıq sheshimlerdi engiziw hám laboratoriyalıq jumıs usılların jetilistiriw bolıp esapalanadı. Ámeliyatqa baǵdarlanǵan oqıw baǵdarlamaları arqalı oqıwshılar tarawdıń real sharayatlarında islew kónlikpesin qáliplestiredi.
Táreplerdiń pikirinshe, bunday birge islesiw tek ǵana jumısshı kúshiniń básekige shıdamlılıǵın arttırıp qoymastan, al mámleketimizde mineral resurslardı qayta islew hám olardan nátiyjeli paydalanıwda áhmiyetli orın iyeleytuǵın jańa áwlad qánigelerin jetistiriwge de xızmet etedi.

N.Ziyodullaeva, ÓzA