Ózbekstan Respublikası Prezidentiniń Pármanı

Insan ómiri, abırayı hám qádir-qımbatın ulıǵlaw, mútájlerge mehir menen qatnas jasaw, jaqsılıq hám ádillik principlerine sadıq qalıw dinimiz, mádeniyatımız hám dástúrlerimizdiń ajıralmas bólegi bolıp esaplanadı.
Sońǵı jıllarda elimizde mámleket hám jámiyet arasında adamgershilikke tiykarlanǵan qatnasıqlardı jánede bekkemlew, mútájlerge járdem kórsetiwge ayrıqsha itibar qaratılmaqta.
Bul iyigilikli baǵdarda elimiz hár qanday dáwirlerde óziniń keńpeyilligi, miyrim-shápááti hám adamgershilik dástúrlerin kórsetip kelmekte. Sonıń ishinde, Ózbekstanǵa alıp kelingen palestinalı puqaralarǵa (keyingi orınlarda – miymanlarǵa) baspana beriliwi hám járdem kórsetiliwi xalqımızdıń ásirler dawamında qáliplesken qádiriyatlarǵa sadıq ekenligi hám mámleketimizdiń haqıyqıy adamgershilik siyasatı ámelde kórsetilip atırǵanınan dárek bermekte.
Miymanlarǵa ádillik principi tiykarında turaqlı ǵamqorlıq hám sociallıq járdem kórsetiwdi támiyinleytuǵın mexanizmlerdi engiziw maqsetinde qarar etemen:
I. Miymanlardıń sociallasıwın támiyinlew
1. Miymanlar ushın qolaylı sharayatlar jaratıw maqsetinde tómendegi jumıslar orınlanǵanı maǵlıwmat ushın qabıl etilsin:
a) miymanlardı waqtınsha jasaw obektlerine jaylastırıw, olardıń dáslepki mútájlikleri boyınsha máseleler sheshildi;
b) myimanlardı medicinalıq tekseriwden ótkeriw hám zárúr dári-dármaqlar penen támiyinlew ilajları kórildi;
v) miymanlardıń jámiyetke integraciyalanıwı hám mánawiy qollap-quwatlanıwın támiyinlew maqsetinde mádeniy-aǵartıwshılıq ushırasıwlar hám doslıq kesheleri sıyaqlı ilajlardı (sonıń ishinde, balalar ushın) óz ishine alatuǵın arnawlı baǵdarlamalar shólkemlestirildi.
II. Miymanlardı jámiyetke integraciyalaw jumısların jedellestiriw
2. Palestinalı nawqaslar hám olarǵa joldas bolatuǵınlardı Ózbekstan Respublikasında jasawǵa beyimlestiriw procesine járdem beriw boyınsha Respublikalıq komissiya (keyingi orınlarda – Respublikalıq komissiya) quramı 1-qosımshaǵa muwapıq tastıyıqlansın.
3. Tómendegiler Respublikalıq komissiyanıń tiykarǵı jumıs baǵdarları etip belgilensin:
a) miymanlarǵa jaratılǵan imkaniyatlardı ámelge asırıw boyınsha mámleketlik uyımlar hám shólkemlerdiń jumısın muwapıqlastırıw;
b) miymanlardı aymaqlar kesiminde jaylastırıw hám usı ilajlar menen baylanıslı shólkemlestiriw máselelerin sheshiw;
v) miymanlardı jámiyetke integraciyalaw menen baylanıslı máselelerdi turaqlı túrde dodalaw hám usı baǵdardaǵı bar tosqınlıqlardı saplastırıw hám mashqalalardı sheshiwge qaratılǵan ilajlar kórip barıw;
g) miymanlardı qollap-quwatlaw boyınsha qısqa hám uzaq múddetlerge mólsherlengen usınıslardı islep shıǵıw, orınlarda ámelge asırılıp atırǵan ilajlar nátiyjeliligin monitoring etiw.
III. Miymanlardıń mútájliklerin anıqlaw jumısların shólkemlestiriw
4. Respublikalıq komissiya (S. Umurzaqov) bir ay múddette miymanlardıń mútájlikleri hám imkaniyatların bahalaw arqalı olardıń jámiyetke integraciyasın támiyinlew boyınsha hár bir shańaraq ushın zárúr bolǵan sociallıq xızmet hám járdem kórsetiw rejelerin islep shıǵıp, tastıyıqlasın.
5. a) Ózbekstan Respublikası Prezidenti janındaǵı Sociallıq qorǵaw milliy agentligi (keyingi orınlarda – Sociallıq qorǵaw milliy agentligi) Respublikalıq komissiyanıń jumısshı uyımı esaplanatuǵını;
b) miymanlar menen máhálle dárejesinde tikkeley jumıslar «máhálle jetiligi» hám «Insan» sociallıq xızmetler orayları tárepinen shólkemlestiriletuǵını;
v) miymanlar ushın islep shıǵılǵan sociallıq xızmet hám járdem kórsetiw rejeleri respublika hám jergilikli atqarıw hákimiyatı uyımları hám olardıń bólimleri ushın májbúriy esaplanatuǵını belgilensin.
IV. Miymanlardı sociallıq xızmet hám járdem menen qamtıp alıw
6. Sociallıq qorǵaw milliy agentligi (M. Olloyorov):
a) Densawlıqtı saqlaw ministrligi (A.Xudayarov) penen birgelikte eki ay múddette mayıplıqqa alıp keletuǵın keselliklerge shatılǵan miymanlarǵa nızamshılıq hújjetlerinde belgilengen emleniw múddetine qaramastan mayıplıqtı belgilew ilajların kórsin;
b) eki hápte múddette mimyanlarǵa zárúr jumıs stajına iye bolmaǵan kekse puqaralarǵa beriletuǵın napaqa tayınlanıwın támiyinlesin.
7. a) hár bir miynet jasındaǵı miyman (I hám II-topar mayıplıǵı bolǵan shaxslar buǵan kirmeydi) ushın hár ayda minimal paydalanıw qárejetleri muǵdarında jasaw napaqası engiziletuǵını;
b) miymanlardıń hár bir shańaraǵına jasaytuǵın mánzili boyınsha turaq jaydıń ijara qárejetleri qaplap beriletuǵını;
v) miymanlarǵa perzent tuwılǵanda beriletuǵın bir mártelik napaqa hám jerlew ushın napaqa tólemi Ózbekstan Respublikası puqaraları ushın belgilengen muǵdarda tólenetuǵını;
g) miymanlardıń hár bir shańaraǵına dáslepki zárúr qurallardı (shańaraqta isletiletuǵın azıq-awqat emes ónimleriniń toplamı) satıp alıw ushın bir mártelik kóterme pul qosımsha túrde tólep beriletuǵını;
d) miymanlardıń shańaraq aǵzaları menen jeke birge islesiw hám individual járdem kórsetiw, sonday-aq, olardıń mútájlikleri hám individual talapların ámelge asırıw maqsetinde birewden máhálledegi sociallıq xızmetker biriktiriletuǵını beliglensin.
V. Miymanlardıń perzentlerin bilimlendiriwge tartıw
8. Mektepke shekemgi hám mektep bilimlendiriwi ministrligi (E.Karimova):
a) miymanlardıń jasaytuǵın mánzilleri boyınsha olardıń perzentlerin mámleketlik imektepke shekemgi bilimlendiriw shólkemlerine hám mekteplerge jaylastırıw;
b) miymanlardıń hár bir perzenti oqıw hám tárbiya procesine beyimlesiwi ushın mektepke shekemgi bilimlendiriw shólkemleri hám mekteplerdiń direktorlarınıń orınbasarların biriktiriw;
v) Joqarı bilimlendiriw, ilim hám innoaciyalar ministrligi menen birgelikte bilimlendiriw shólkemlerinde miymanlar perzentleriniń beyimlesiwi hám hár tárepleme kamal tabıwı boyınsha turaqlı monitoringti ámelge asırıw ilajların kórsin.
9. a) miymanlar mámleketlik mektepke shekemgi bilimlendiriw shólkmelerinde balalar támiynatı ushın ata-analar tóleminen 2028-jıl 1-yanvarına shekem azat etiletuǵını;
b) miymanlardıń perzentleri mámleketlik mektepke shekemgi bilimlendiriw shólkemleri hám mekteplerge gezekke qoyılmaǵan halda, «Insan» sociallıq xızmetler orayları talapnaması tiykarında jaylastırılatuǵını;
v) Ózbekstan Respublikası Prezidentiniń 2025-jıl 17-yanvardaǵı «2025-jılı xalıqtıń bántligin támiyinlew hám kámbaǵıllıqtı qısqartıw ilajları haqqında»ǵı PQ-12-sanlı qararı sheńberinde miymanlardıń perzentlerin mámleketlik ulıwma orta bilimlendiriw shólkemlerine qosımsha bilimlendiriwge (kásip-óner, málimleme texnologiyaları, joqarı bilimlendiriw shólkemlerine tayarlaw baǵdarında) tartıw hám olardı oqıtıw qárejetleriniń 100 procenti Mámleketlik byudjet qarjıları esabınan qaplap beriletuǵını belgilensin.
10. Joqarı bilimlendiriw, ilim hám innovaciyalar ministrligi (K.Sharipov) eki ay múddette miymanlardıń sırt elde ulıwma orta arnawlı, kásip-óner (Professional), joqarı bilimlendiriw, qayta tayarlaw hám mamanlıq arttırıw bilimin alǵanı haqqındaǵı hújjetlerin tán alıwdı test sınaqlarısız hám jıyım óndirmegen halda ámelge asırsın.
VI. Miymanlardıń densawlıǵın qollap-quwatlaw
11. Densawlıqtı saqlaw ministrligi (A.Xudayarov):
a) miymanlardıń jasaytuǵın mánzilleri boyınsha shańaraqlıq shıpaker punktleri , shańaraqlıq poliklinikalar hám rayon (qala)lıq kóp tarmaqlı oraylıq poliklinikalarında esapqa qoyılıwın támiyinlesin;
b) miymanlarǵa Mámleketlik byudjet qarjıları esabınan medicinalıq járdem kórsetiwde kámbaǵal shańaraqlarǵa tiyisli shasxlar kategoriyası qatarında jollama ajıratıp barsın.
VII. Miymanlardıń bántligi támiyinlew
12. Kámbaǵallıqtı qısqartıw hám bántlik ministrligi (B.Zaxidov) Sociallıq qorǵaw milliy agentligi (M.Olloyorov) menen birgelikte bir ay múddette miymanlardıń tilegine bola olardıń bántligin támiyinlew, zamanagóy kásip-ónerdi iyelewine járdem beriw boyınsha Respublikalıq komissiyaǵa usınıslar kirgizsin.
13. Ekonomika hám qarjı ministrligi, Kámbaǵallıqtı qısqartıw hám bántlik ministrligi, Oraylıq bank, AT «Xalıq banki» hám basqa kommerciyalıq bankler isbilermenlik penen shuǵıllanıw tileginde bolǵan miymanlardı shańaraqlıq isbilermenlikti rawajlandırıw, «Kishi biznesti úzliksiz qollap-quwatlaw», «Bizneske birinshi qádem» hám «Kámbaǵallıqtan abadanlıqqa qaray» baǵdarlamaları sheńberinde isbilermenlikke tartıw ilajların kórsin. Onda baǵdarlamalar sheńberinde miymanlar qarjılay járdemlerden paydalanıwı ushın buyırtpalar qabıl etiw hám ajıratılǵan qarjılardan paydalanıwdı monitoring etiw hákim járdemshileri hám máhálle bankirleri tárepinen ámelge asırıladı.
VIII. «Máhálle jetiligi»niń miymanlar menen islesiwin shólkemlestiriw
14. Ózbekstan máhálleleri associaciyası, Sociallıq qorǵaw milliy agentligi, jaslar isleri agentligi hám Shańaraq hám hayal-qızlar komitetiniń 2-qosımshaǵa muwapıq miymanlardı awızbirshilikli túrde máhálleniń aǵartıwshılıq ortalıǵına qosıw boyınsha «máhálle jetiligi» hám basqa wákillerge qosımsha wazıypalardı júklew haqqındaǵı usınısına kelisim berilsin.
15. Ózbekstan máhálleleri associaciyası (K.Kuranbaev), Densawlıqtı saqlaw ministrligi (A.Xudayarov), Jaslar isleri agentligi (A.Sadullaev) hám Shańaraq hám hayal-qızlar komiteti (Z.Maxkamova) bir ay múddette «máhálle jetiligi» hám basqa wákillerge qosımsha júklengen wazıypalarǵa tiykarınan ishki baǵdarlamalardı qabıl etsin hám reje-kestege muwapıq zárúr ilajlar kórip barsın.
IX. Miymanlardı qollap-quwatlaw ilajların qarjılandırıw hám Pármannıń orınlanıwın shólkemlestiriw
16. Ekonomika hám qarjı ministrliginiń miymanlardıń máselelerin sheshiw ilajların qarjılandırıw maqsetinde Sociallıq qorǵaw milliy agentligi janında yuridikalıq tárep statusısız arnawlı qordı shólkemlestiriw haqqındaǵı usınısı maqullansın.
17. a) arnawlı qor tómendegi dárekler esabınan qáliplestiriledi:
(i) yuridikalıq hám fizikalıq táreplerdiń qáwenderlik qayıqomlıqları;
(ii) xalıqaralıq shólkemlerdiń grantları hám nızamshılıq hújjetlerinde qadaǵan etilmegen basqa dárekler;
(iii) arnawlı qordıń waqtınsha bos turǵan qarjılardı kommercialıq banklerge depozitke qoyıwdan alınǵan procent túrindegi dáramat;
b) arnawlı qor qarjıları miymanlardıń tómendegi mútájliklerine baǵdarlanadı:
(i) zárúr sharayatlar jaratıw hám tiyisli xızmetlerdi shólkemlestiriw;
(ii) túrli qárejetlerdi qaplaw hám qollap-quwatlaw ilajların kóriw;
(iii) materiallıq járdem kórsetiw hám sociallıq qollap-quwatlaw ilajların ámelge asırıw.
18. Sonday tártip ornatılsın, oǵan muwapıq:
a) arnawlı qordıń qarjılarına iyeltk etiw Respublikalıq komissiyanıń qararı tiykarında ámelge asırıladı;
b) arnawlı qordıń qárejetleriniń baǵdarlarına ózgerisler kirgiziw Respublikalıq komissiyanıń qararına muwapıq ámelge asırıladı;
v) miymanlarǵa fizikalıq hám yuiridikalıq shaxslar tárepinen biyǵárez beriletuǵın múlkler (turaq jay hám avtotransport) jergilikli hákimliklerdiń balansına ótkerilip, Respublikalıq komissiyası tárepinen basqarıladı.
19. Bas prokuratura (I.Adxamov) Sociallıq inspekciya (X. Kutpiddinov) menen birgelikte usı Pármannıń óz waqtında hám tolıq orınlanıwın turaqlı túrde qadaǵalap barsın.
20. Ishki isler ministrligi (A. Tashpulatov) Mámleketlik qáwipsizlik xızmeti (B. Kurbanov), Sociallıq qorǵaw milliy agentligi (M.Olloyorov), Sırtqı isler ministrligi (B.Saidov) hám Ádillik ministrligi (A.Tashkulov) menen birgelikte bir ay múddette miymanlarǵa jasaw gúwalıǵı (ID-karta) rásmiylestiriliwin hám olardıń dizimnen ótkeriliwin támiyinlesin.
21. Usı pármannıń orınlanıwın nátiyjeli shólkemlestiriwge juwapker hám jeke juwapker etip Bas ministrdiń orınbasarı J.A.Qwchqorov hám Ózbekstan Respublikası Prezidentiniń sociallıq qorǵaw boyınsha keńesgóyi – Sociallıq qorǵaw milliy agentligi direktorı M.P.Olloyorov belgilensin.
22. Pármannıń orınlanıwın qadaǵalaw hám orınlaw ushın juwapker shólkemlerdiń jumısın muwapıqlastırıw Ózbekstan Respublikası Bas ministri A.N.Aripov hám Ózbekstan Respublikası Prezidentiniń strategiyalıq rawajlanıw boyınsha keńesgóyi S.U.Umurzaqovqa júklensin.

Ózbekstan Respublikası
Prezidenti Sh.MIRZIYoEV
Tashkent qalası,
2025-jıl 14-avgust