Bıyıl 8-avgust kúngi ÓRN-1080-sanlı Nızam menen ámeldegi Jınayat kodeksiniń 229-2-statyası ekinshi bólim menen tolıqtırıldı.

Oǵan bola, “arnawlı diniy maǵlıwmatı bolmay turıp hám diniy shólkem basqarması oraylıq uyımınıń ruqsatısız jas óspirimge diniy táliymattan sabaq beriw, sonday-aq, jas óspirimge jeke tártipte diniy táliymattan sabaq beriw, BEMniń 50 esesinen 100 esesine shekemgi muǵdarda járiyma yamasa 360 saatqa shekem májbúriy jámiyetlik jumıslar yamasa 3 jılǵa shekem miynet penen dúzetiw jumısları yamasa 1 jıldan 3 jılǵa shekem erkin sheklew yamasa 3 jılǵa shekem erkinen ayırıw menen jazalanadı.”
Bul Nızam 2025-jıl 10-noyabrden kúshke kiredi.
Aldın ÓRN-1035-sanlı nızam menen “Bala huqıqlarınıń kepillikleri haqqında”ǵı nızamǵa qosımsha kirgizilgen hám oǵan bola ata-analar yamasa olardıń ornın basıwshı shaxslar óz perzentin jeke isenimlerine muwapıq diniy hám ádep-ikramlılıq jaqtan tárbiyalaw huqıqına iye ekeni, olar tárepinen óz perzentin nızamǵa qayshı túrde diniy bilim alıwǵa tartıwǵa, yaǵnıy balanı dizimnen ótpegen yaki licenziyaǵa iye bolmaǵan shólkemlerge yaki arnawlı diniy bilimge iye bolmaǵan hám diniy shólkemlerdiń Ózbekstan boyınsha oraylıq basqarıw uyımınıń ruqsatısız diniy bilimlendiriwdi ámelge asırıp atırǵan shaxslarǵa diniy bilim alıw ushın tapsırıwǵa jol qoyılmaytuǵını belgilengen edi,-dep málimleme beredi xabar.uz saytı.

Qaraqalpaqstan xabar agentligi