Qıtayda komada bolǵan 18 jasar Czyan CHennanǵa universitetke qabıl etilgenligi haqqındaǵı xattı kórsetkennen keyin ózine keldi, dep jazadı South China Morning Post. Segiz kún komada jatqan qızǵa bul jaqsı xabardı onıń ákesi jetkerdi.
Kelesi kúni Czyan CHennan ózine kelip, tuwısqanları menen videobaylanıs arqalı sáwbetlesti.

Qız 11-iyul kúni temperaturası kóterilip, kókireginde qısılıw sezimi payda bolǵanlıǵı sebepli shıpakerlerge múrájat etken. Kiriw imtixanın tapsırıp, shıpakerlerdiń aldına kelgen. Málim bolıwınsha, ol júrektiń isiniwi – fulminant miokardit penen kesellengen. Bunday diagnoz kóbinese ólimge alıp keledi, keselliktiń tiykarǵı sebepleri viruslı infekciyalar, stress hám salamat emes turmıs tárizi bolıp esaplanadı, áyne bul jaǵdayda oǵan ne sebep bolǵanı anıqlanbadı. Abiturient komaǵa túskennen soń, onıń ómirin júrek-ókpe apparatı járdeminde saqlap qalıwǵa erisildi, dep xabar bermekte sırt el ǴXQ.
Shıpakerlerdiń atap ótiwinshe, qızdıń júrek iskerligi tolıq tiklengen, házirgi waqıtta onıń “oyanıwı”nıń anıq sebebi belgisiz bolıp qalmaqta.
Basılımnıń qosımsha etiwinshe, Czyan CHennannıń shańaraǵı 2023-jılı ákesi baxıtsız hádiysege ushırap, qarızǵa batqanınan keyin finanslıq qıyınshılıqlardı basınan ótkermekte. Anası eń bolmasa pul tabıw ushın kóshe awqatların satıwǵa májbúr. “Pul menen baylanıslı qanday mashqalalarımız bolsa da, onı universitetke oqıwǵa jiberemen, sebebi bul onıń ármanı”, dedi qızdıń ákesi.

Qaraqalpaqstan xabar agentligi