Din isleri boyınsha komitet administraciyası tiyisli qarar menen “Umra” ilajların shólkemlestiriw hám ótkeriw jumısında qadaǵalaw satıp alıwın ámelge asırıw tártibine baylanıslı rejeni tastıyıqladı.

Reje “Umra” ilajların shólkemlestiriw hám ótkeriw jumısında tutınıwshılardıń huqıqların qorǵaw, licenziyaǵa iye bolmaǵan shaxslar tárepinen nızamsız xızmetler kórsetiliwin erte anıqlaw hám aldın alıw maqsetinde qadaǵalaw satıp alıwın ámelge asırıw tártibin belgileydi.
Rejege muwapıq, Komitetke kelip túsken múrájatlar yaki usı sıyaqlı qolǵa kirgizilgen maǵlıwmatlar tiykarında juwapker xızmetkerler “Sırlı qarıydar” ilajında qatnasadı.
Onda Komitettiń juwapker xızmetkerleri ózin qarıydar sıpatında tanıstırǵan halda “Umra” xızmetlerin nızamsız ámelge asırıwda gúman etilip atırǵan fizikalıq yaki yuridikalıq táreplerdiń jumısın tekseredi.
Ilaj dawamında nızamsız jumıs alıp barıp atırǵanında gúman etilip atırǵan fizikalıq yaki yuridikalıq tárepke tiyisli tómendegi maǵlıwmatlar toplanadı:
– “Umra” xızmetin kórsetiw ushın tiyisli licenziya bar ekenligi (rásmiy hújjet yaki awız-eki maǵlıwmat tiykarında);
– “Umra” xızmetin kórsetiw shártleri (múddeti, bahası hám basqalar);
– “Umra” xızmeti ushın tólem usılı hám esap beti.
“Sırlı klient” ilajı dawamında jasırın diktofon yaki video baqlaw qurılmalarınan paydalanıwǵa ruqsat beriledi. Diktofon yamasa videobaqlaw qurılmaları járdeminde jazıp alınǵan maǵlıwmatlar Komitet tárepinen qabıl etiledi hám olardan usı Rejede kórsetilgen jaǵdaylardan tısqarı basqa maqsetlerde paydalanıwǵa jol qoyılmaydı.
Usı Reje talaplarınıń buzılıwında ayıplı bolǵan shaxslar nızamshılıq hújjetlerine muwapıq juwap beredi,-dep málimleme beredi xabar.uz saytı.

Qaraqalpaqstan xabar agentligi