Usı jıldıń 1-noyabrinen Ózbekstanda jumıssızlıq napaqasınıń muǵdarı arttırıladı hám onı alıw shártleri ózgeredi. Bul haqqında Prezident pármanında belgilengen.

Hújjetke bola, jumıssızlıq napaqası tek ǵana miynet shártnaması biykar etilgen hám sońǵı bes jılda keminde 18 ay islegen shaxslarǵa tólenedi.
Napaqa tayınlaw ushın miynet shártnaması biykar etilgeninen keyin 6 ay ishinde múrájat etiw kerek. Bul jaǵdayda sońǵı 1,5 jıldaǵı ortasha aylıq miynet haqı esabınan úsh ay dawamında tólem ámelge asırıladı.
Birinshi ayda – ortasha aylıq miynet haqınıń 75 procenti muǵdarında, biraq miynetke haqı tólewdiń eń kem muǵdarı (MHTEKM)nıń 3 esesinen (3,813 mln sum) aspaǵan halda tólenedi. Aldın tólem muǵdarı ortasha aylıq miynet haqınıń 50 procentin quraytuǵın edi. Keyingi aylarda – ortasha aylıq miynet haqınıń 50 procenti, biraq MHTEKMnıń 3 esesinen kóp bolmaǵan muǵdarda tólenedi.
Jumıssızlıq napaqasın qayta tayınlaw ushın aldın tayınlanǵan napaqa alıw múddeti juwmaqlanǵannan keyin rásmiy túrde keminde 12 ay islegen bolıwı kerek.
Eger napaqa alıwshı bántlik uyımlarınıń jollaması menen sáwbetlesiwge yamasa járiyalanǵan bos jumıs orınlarına barmasa, yamasa oǵan usınıs etilgen sáykes jumıstan bas tartsa, napaqa tólemi kelesi aydıń 1-sánesinen toqtatıladı.

Qaraqalpaqstan xabar agentligi