Húrmetli qurılısshılar, injener hám qánigeler, taraw veteranları!

Bárinen burın, siz, ázizlerdi búgingi qutlı kásiplik bayramıńız benen qızǵın qutlıqlap, hámmeńizge joqarı húrmetim hám jaqsı tileklerimdi bildiremen.
Sizler sıyaqlı mıńlaǵan sheber qurılısshı hám injenerler, usta hám arxitektorlar, joybarlawshı hám qánigelerdiń mashaqatlı miyneti menen Jańa Ózbekstannıń jańa abat hám kórkem kelbeti qáliplespekte, xalqımızdıń turmısı barǵan sayın abadan bolıp barmaqta. Onıń ushın hámmeńizge shın júregimnen minnetdarshılıq bildiremen.
Keyingi jıllarda qurılıs industriyasınıń rawajlanıwı jańa basqıshqa kóterilip, bul taraw milliy ekonomikamızdıń drayverlerinen birine aylandı. Sońǵı segiz jıl dawamında qurılıs isleriniń kólemi bir neshe esege artıp, 2016-jıldaǵı 30 trillion sumnan 2024-jılda derlik 234 trillion sumǵa jetkeni de bul pikirdi tastıyıqlaydı.
Ótken jılı elimizde ulıwma 40 million 500 mıń kvadrat metr imarat hám kompleks qurılǵan bolsa, bıyılǵı jılı bul san 45 million kvadrat metrden artıwı kútilmekte.
Xalqımızdıń ósip atırǵan talabı hám tileklerinen kelip shıǵıp, 2024-jılı 100 mıńnan aslam kvartiraǵa iye bolǵan 2 mıń 44 kóp qabatlı turaq jay qurıldı. Búgingi kúnde xalıqtıń jan basına tuwra keletuǵın turaq jaydıń kólemi 2020-jıldaǵı 16 kvadrat metrden 19 kvadrat metrge jetkenin ayrıqsha atap ótiw zárúr.
Itibarlısı sonda, bul baǵdardaǵı jumıslar izbe-iz dawam ettirilip, 56 aymaqtaǵı «Jańa Ózbekstan» massivlerinde qurılıs jumısları jedel alıp barılmaqta. Bıyılǵı jılı xalqımızǵa 135 mıń turaq jay tapsırıladı. 2030-jılǵa shekem «Jańa Ózbekstan» massivleriniń sanın 100 ge jetkeriw maqset etilgen, bul bolsa 250 mıń turaq jay degeni.
Dúnyanıń aldınǵı kompaniyaları menen birgelikte «Jańa Tashkent» joybarı sheńberinde 20 mıń gektar maydanda 2 million xalıq ushın qolaylı infrastruktura jaratılmaqta.
Házirgi waqıtta Jańa tashkent qalası qurılısınıń birinshi basqıshında Ózbekstan Milliy kitapxanası, Jańa Ózbekstan universiteti, Áliysher Nawayı atındaǵı xalıqaralıq ilimiy-izertlew orayı, muzeyi, qánigelestirilgen mektep hám maqam orayı, Nizamiy atındaǵı Tashkent mámleketlik pedagogikalıq universiteti sıyaqlı iri imarat hám obektler qurılmaqta.
Bulardıń barlıǵı qolı gúl qurılısshılarımız qanday úlken sheklerge erisip atırǵanın ayqın dállileydi.
Qádirli doslar!
Basqa tarawlar qatarında qurılıs tarmaǵında da dáwir talabı tiykarında sanlastırıw procesi jedel rawajlanbaqta. Tarawda 30 dan aslam málimleme sisteması engizildi. «Ashıq-aydın qurılıs» milliy málimleme sistemasında 22 mámleketlik xızmettiń sanlastırılǵanı nátiyjesinde artıqsha qaǵazpazlıq hám áweregershiliklerge shek qoyıldı. Tender platformasınıń engiziliwi sebepli insan faktorınıń aralasıwı saplastırıldı, ashıq-aydınlıq báseki ortalıǵı qáliplestirildi.
Turaq jay qurılısında úlesker sıpatında qatnasqan puqaralarımızdıń huqıqların qorǵaw maqsetinde «Eskrou» sisteması engizilmekte. Usı tiykarda isenimli developerler bazarı qáliplestiriledi.
Búgingi kúnde qala qurılısı tarawında da jańa dáwir baslandı, desek, durıs boladı. Endi bas rejeler ulıwma jańa mazmun hám kóriniste islep shıǵılıp, geomálimleme sistemasına jaylastırıw ushın sanlastırılmaqta. Atap aytqanda, 2024-jılı 146 qala qurılısı hújjetleri sanlastırıldı. 2025-jılı bul kórsetkish 180ge jetkeriledi.
Qurılıs resurslarınıń milliy klasifikatorı jaratılıp, bahalardı qáliplestiriw hám obektlerdiń smeta bahasın anıqlaw da elektron sistemaǵa ótkerilmekte.
Qurılıs processleriniń barlıq basqıshlarında jámiyetshiliktiń pikirin inabatqa alıw, qadaǵalaw procesinde qatnasıǵın támiyinlew hám qurılıstıń sapasın jaqsılaw maqsetinde qadaǵalaw mexanizmleriniń nátiyjeliligin arttırıw úlken áhmiyetke iye.
Usı baǵdarda qadaǵalaw jumısın tolıq sanlastırıw, obektlerde jumıslardıń barısın kúndelikli qadaǵalap barıw hám real waqıt rejiminde baqlaw imkaniyatın jaratqan halda kemshiliklerdi óz waqtında saplastırıw taraw wákilleri aldında turǵan áhmiyetli wazıypalardan biri bolıp esaplanadı.
Sizler búgingi zamannıń ózi aldımızǵa qoyıp atırǵan, áne, usınday áhmiyetli talaplardı tereń ańlap, joqarı nátiyjelilik menen miynet etesizler. Miynetkesh qurılısshılarımızdıń miynet hám turmıs sharayatların jaqsılaw, olardı múnásip xoshametlew máseleleri bunnan bılay da turaqlı itibarımız orayında bolıp qaladı.
Hár bir qurılǵan imarat – bul biziń keleshek áwladlarǵa qaldıratuǵın ullı miyrasımız, hár bir kóshe hám qalanıń kórinisinde sizlerdiń qol izińiz bar ekenligi, insanlar baxtı hám quwanıshı menen sizlerdiń miynetińiz benen baylanıslı ekenligin hesh qashan umıtpań.
Jańa Ózbekstandı qurıwda aldımızda zamanagóy qalalar, qolaylı turaq jaylar massivleri, insanlarǵa shadlıq baǵıshlawshı biytákirar imaratlardı qurıw sıyaqlı úlken wazıypalar turıptı hám onı ámelge asırıwda biz sizdey – ájayıp, sheber hám miynetkesh qurılısshılarımızǵa isenemiz hám súyenemiz!
Húrmetli qurılısshılar!
Sizlerdi – mámleketimizdi hár tárepleme gózzal hám biytákirar diyarǵa aylandırıwday maqtanıshlı islerge shın júrekten úles qosıp atırǵan barlıq watanlaslarımızdı búgingi bayram menen jáne bir márte shın júrekten qutlıqlayman.
Elimizdiń rawajlanıwı hám abadanlıǵı jolında siz, ázizlerge jańa jetiskenlik hám áwmetler yar bolsın!

Shavkat Mirziyoev,
Ózbekstan Respublikası Prezidenti