Ózbekstan geografiyalıq jaylasıwına qaray, dúnyada teńizge shıǵıw imkaniyatı bolmaǵan hám sonıń menen birge, pútkilley teńizge shıǵıw imkaniyatı joq basqa mámleketler menen qorshalǵan eki mámleketten biri (Lixtenshteyn menen birge). Bul jaǵday transport izolyaciyasın jeńip ótiw hám global ekonomikalıq processlerge tolıq tartıw quralı sıpatında sanlı sheshimlerdiń áhmiyetin bir neshe márte arttıradı.

Teńizge tikkeley shıǵıw imkaniyatına iye bolmaǵan rawajlanıp atırǵan mámleketler (LLDCs) boyınsha BMSh xalıqaralıq konferenciyası tikkeley teńizge shıǵıw imkaniyatına iye bolmaǵan mámleketlerdi qollap-quwatlaw boyınsha xalıqaralıq strategiyalardı islep shıǵıw maqsetinde BMSh qáwenderliginde hár on jılda ótkeriledi. Birinshi konferenciya 2003-jılı Almatı qalasında (Qazaqstan) bolıp ótken hám Almatı háreket bagdarlamasına start berilgen. 2014-jılı bolsa Vena qalasında (Avstriya) 10 jıllıq Vena háreket baǵdarlaması qabıl etilgen.
Sanlı texnologiyalar ministriniń birinshi orınbasarı O.Umarov BMShtıń teńizge shıǵıw imkaniyatı bolmaǵan rawajlanıp atırǵan mámleketler boyınsha úshinshi xalıqaralıq konferenciyasında qatnastı.
Onda dúnyanıń 32 mámleketinen 3000 nan aslam delegatlar qatnastı.
Konferenciya turaqlı rawajlanıw hám mámleketlerdiń sanlı transformaciyası máseleleri boyınsha húkimetler, biznes hám xalıqaralıq sherikler arasındaǵı sóylesiw ushın tiykarǵı maydan wazıypasın atqaradı.
Húkimetler, xalıqaralıq shólkemler, jeke menshik sektor hám ilimiy toparlardıń wákilleri sanlı tosqınlıqlardı saplastırıw, transshegaralıq sawdanı jedellestiriw hám LLDCs mámleketleriniń global sanlı ekonomikaǵa jáne de ádalatlı qatnasın támiyinlewge uqıplı bolǵan inklyuziv sanlı ekosistemalardı qáliplestiriw imkaniyatların kórip shıqtı.
Sanlı infrastrukturanı rawajlandırıw, sanlı bazarlardı integraciyalaw hám LLDCs mámleketleriniń institucionallıq potencialın arttırıwǵa ayrıqsha itibar qaratıldı.
Usı jerde Ózbekstannıń sanlı rawajlanıw tarawındaǵı jetiskenliklerine názer taslaytuǵın bolsaq, telekommunikaciyalarǵa jıllıq investiciyalar 1 milliard dollardan asadı. Xalıqaralıq reytinglerde mámleketimiz sımlı internet boyınsha 76-orınǵa, mobil internet boyınsha bolsa 71-orınǵa kóterildi. Elektron húkimet 770 ten artıq xızmetlerdi qamtıp aladı, olardan hár kúni 12 millionnan artıq adam paydalanadı. Ózbekstan global e-gov reytinginde 63-orındı iyeleydi.
Elimizde IT tarawında 190 mıńnan aslam qánige isleydi. IT park rezidentleri sanı 2900 den astı, 2025-jıldıń aqırına shekem xızmetler kólemi 1 milliard dollarǵa jetiwi kútilmekte. 600 den aslam startap rawajlanbaqta. Jasalma intellektke tayarlıq reytinginde mámleketimiz 70-orınǵa kóterildi.
Ózbekstan Respublikası Sanlı texnologiyalar ministrliginiń maǵlıwmatına bola, sessiyanıń barlıq qatnasıwshıları globallıq ekonomikaǵa kiriwde eki tárepleme tosqınlıqlarǵa dus kelip atırǵan mámleketler ushın sanlı sheshimlerdiń áhmiyetin atap ótti.

A.RUSTAMOV,
ÓzA