Túrkmenstannıń Avaza qalasında bolıp ótip atırǵan BMShtıń teńizge shıǵıw imkaniyatı joq rawajlanıp atırǵan mámleketler boyınsha konferenciyası sheńberinde Ózbekstan Respublikası ádillik ministri Akbar Toshqulov bir qatar áhmiyetli ushırasıwlarda qatnastı.

A.Toshqulov forumda shıǵıp sóylegen sózinde puqaralıq jámiyetiniń sociallıq-ekonomikalıq reformalardaǵı ornı, regionallıq integraciya hám klimat turaqlılıǵına erisiwdegi áhmiyeti, sonday-aq, puqaralıq baslamaları arqalı sistemalı mashqalalardı sheshiw zárúrligin atap ótti.
Puqaralıq jámiyeti bul tek ǵana birge islesiwshi emes, al mámleket hám xalıq arasındaǵı kópir ekeni atap ótildi. Áyne puqaralıq baslamaları sistemalı mashqalalar haqqında birinshi bolıp jar saladı, innovaciyalardı alǵa qoyadı hám mámleketlerdi insan talaplarına jaqınlastırıwǵa járdem beredi. Ózbekstanda bunday baslamalardı ámelge asırıw ushın barlıq zárúr sharayatlar jaratılǵan.
Túrkmenstan ádillik ministri Merettagan Taganov penen ushırasıwda 2022-jılı qabıl etilgen birge islesiw baǵdarlamasınıń tabıslı juwmaqlanǵanı atap ótildi.
Jańa baǵdar joybarı sheńberinde birge islesiwdi kúsheytiwge kelisip alındı. Ádillik sistemasın sanlastırıw, jasalma intellekt texnologiyaların engiziw, advokatura hám mediaciyanıń rawajlanıwı, yuridikalıq kadrlar tayarlaw baǵdarında tájiriybe almasıldı.
Ushırasıwda, sonday-aq, Oraylıq Aziya hám basqa rawajlanǵan mámleketlerdiń ádillik uyımları menen kóp tárepleme birge islesiwdi keńeytiw máseleleri de dodalandı.

N.Abduraimova, ÓzA