Usı jıl 12-iyul kúni Qaraqalpaqstan Respublikası Joqarǵı Keńesiniń besinshi sessiyası bolıp ótti.

Sessiyaǵa Ózbekstan Respublikası Oliy Majlisi Senatı aǵzaları, ministrlikler hám taraw basshıları, deputatlar hám ǵalaba xabar qurallarınıń wákilleri qatnastı.

Dáslep Ózbekstan hám Qaraqalpaqstan Resublikalarınıń mámleketlik gimnleri jańladı.

Sessiyanı Qaraqalpaqstan Respublikası Joqarǵı Keńesiniń Baslıǵı A.Orınbaev basqarıp bardı.

Sessiya «Qaraqalpaqstan» telekanalı arqalı tikkeley efirden berilip barıldı.

Sessiyanıń kún tártibindegi dáslepki másele «Qaraqalpaqstan Respublikasınıń ayırım nızamlarına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha  Joqarǵı Keńestiń komitet baslıǵı A.Atajanov bayanat jasadı. Sessiyanıń kún tártibindegi dáslepki másele boyınsha qarar qabıl etildi.

Kún tártibindegi keyingi másele «Qayta tikleniwshi energiya dereklerinen paydalanıw haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń Sanaat, qurılıs, transport hám málimleme texnologiyaları máseleleri komiteti baslıǵınıń orınbasarı J.Berdixanov bayanat jasadı.

Mámleketimizde energiya turaqlılıǵın támiyinlew, qayta tikleniwshi energiya dereklerin hám energiya únemlewshi texnologiyalardı engiziw, tarawdı mámleket tárepinen qollap-quwatlaw mexanizmlerin jetilistiriw baǵdarında isenimli qádemler taslanıp, salmaqlı nátiyjelerge erisilip atırǵanın atap ótiw orınlı. Bul baǵdarda úlken potencialǵa iye bolǵan Qaraqalpaqstan ushın elektr energiyasın islep shıǵarıw boyınsha úlken maqsetli rejeler belgilep alınǵan.

Bul nátiyjelerge erisiwde eń dáslep, tarawdıń huqıqıy tiykarın jetilistiriw talap etiliwi oǵada áhmiyetli bolıp, usı maqsette «Qayta tikleniwshi energiya dereklerinen paydalanıw haqqında»ǵı Qaraqalpaqstan Respublikası nızamı islep shıǵıldı. Kún tártibindegi bul másele de tolıq kórip shıǵılıp, tiyisli qarar qabıl etildi.

Kún tártibindegi keyingi másele onkologiyalıq keselliklerdi erte basqıshta anıqlaw, analıqtı hám balalıqtı qorǵaw, sırt el kompaniyalarınıń dárilerin tiykarsız buyırıw jaǵdaylarına shek qoyıw, tarawda byudjet qarjılarınıń maqsetli jumsalıwın támiyinlew hám korrupciyaǵa qarsı gúresiw boyınsha Qaraqalpaqstan Respublikası Densawlıqtı saqlaw ministrligine jiberilgen Parlamentlik sorawdıń nátiyjesi tuwralı bolıp, bul másele boyınsha Densawlıqtı saqlaw ministrligi M.Qurbanov shıǵıp sóyledi. Bunnan soń kún tártibindegi másele tolıq kórip shıǵılıp, deputatlar tárepinen arnawlı qarar qabıl etildi.

«Kámbaǵallıqtan abadanlıqqa qaray» baǵdarlaması tiykarında belgilengen wazıypalardıń orınlanıwı boyınsha Qaraqalpaqstan Respublikası Kámbaǵallıqtı qısqartıw hám bántlik ministrligine parlamentlik soraw jiberiw haqqındaǵı keyingi másele tuwralı Joqarǵı Keńestiń Byudjet, ekonomikalıq reformalar, investiciyalar hám innovaciya máseleleri komitetiniń baslıǵı B.Seytnazarov bayanat jasadı.

Bul másele de tolıq kórip shıǵılıp, tiyisli qarar qabıl etildi.

Bunnan soń kún tártibindegi  keyingi másele boyınsha Qaraqalpaqstan Respublikası Joqarǵı Keńesiniń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komiteti tárepinen islenip atırǵan jumıslar haqqında Joqarǵı Keńestiń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komiteti baslıǵı M.Atamuratovtıń málimlemesi tıńlandı.

Bul máselede tolıq qarap shıǵıldı hám deputatlar tárepinen qarar qabıl etildi.

«Ózbekstan Respublikası Prezidentiniń “Ózbekstan-2030” strategiyası haqqında»ǵı pármanınıń Qaraqalpaqstan Respublikasında orınlanıw barısı boyınsha Qaraqalpaqstan Respublikası Ministrler Keńesiniń esabatı tuwralı keyingi másele boyınsha  Ministrler Keńesi Baslıǵınıń orınbasarı – Investiciyalar, sanaat hám sawda ministri V.Jollıbekov bayanat jasadı.

Respublikamızda isbilermenlik jumısların bunnan bılay da rawajlandırıw, sırt el investiciyaların tartıw, eksporttı qollap-quwatlaw, investiciyalıq joybarlardı iske túsiriw arqalı jańa óndirislik quwatlıqların hám xalqımız ushın jańadan joqarı dáramatlı jumıs orınların jaratıw maqsetinde Ózbekstan Respublikasınıń basqa aymaqlarında engizilmegen imkaniyat hám jeńillikler jaratıp berildi. Usı tiykarda 2025-jıldıń ótken 6 ayı dawamında bir qatar unamlı jumıslar alıp barılıwı nátiyjesinde joqarı jetiskenliklerge erisildi.

Sonday-aq, «Ózbekstan – 2030» strategiyasına muwapıq, 2030-jılǵa shekem sırt el investiciyası hám kreditlerin ózlestiriw, eksport prognoz kórsetkishleri hám iri investiciyalıq joybarlardı iske túsiriw kórsetkishlerin jaqsılawda hár jılı basqıshpa-basqısh joqarı nátiyjelerge erisiw maqsetinde reje hám wazıypalar belgilep alınǵanlıǵı atap ótildi.

Kún tártibindegi bul másele de tolıq kórip shıǵılıp, deputatlar tárepinen qarar qabıl etildi.

Kún tártibindegi keyingi másele xalıq arasında salamat turmıs tárizin qáliplestiriw, jaslardı dene tárbiya hám sportqa qamtıp alıw boyınsha alıp barılıp atırǵan jumıslar haqqında bolıp, bul másele boyınsha Qaraqalpaqstan Respublikası Sport ministri E.Qutıbaev bayanat jasadı.

Búgingi kúnde elimizde salamat turmıs tárizin qáliplestiriwge, xalıqtıń, ásirese, jas áwladtıń dene tárbiya hám sport penen turaqlı shuǵıllanıwı ushın zaman talaplarına say sharayatlar jaratıwǵa, sonday-aq, dene tárbiya hám ǵalabalıq sporttı bunnan bılay da rawajlandırıwǵa baǵdarlanǵan keń kólemli jumıslar ámelge asırılıp atırǵanın atap ótiw orınlı.

Ásirese, Prezidentimizdiń basshılıǵında 2025-jıl 13-fevral kúni olimpiya hám paralimpiya háreketi, qánigelestirilgen hám ǵalabalıq sporttı jańa basqıshqa alıp shıǵıw hám xalıqtıń fizikalıq belsendiligin arttırıwǵa baǵıshlanǵan videoselektor májilisinde berilgen tapsırmalar bul baǵdardaǵı iygilikli jumıslardı jańa basqıshqa kótermekte.

Sessiyada belgilep alınǵan wazıypalar, berilgen tapsırmalar tiykarında respublikamızda bir qatar ilajlar ámelge asırılıp, bul baǵdardaǵı jumıslar ele de dawam ettirilip atırǵanlıǵı atap ótildi. Kún tártibindegi gezektegi másele kórip shıǵılıp, bul boyınsha tiyisli qarar qabıl etildi.

Kún tártibindegi keyingi másele awıl xojalıǵında suw resurslarınan maqsetli paydalanıw, suw ısırapkershiligin azaytıw hám suwdı únemlewge qaratılǵan ilajlardıń orınlanıw barısı haqqında bolıp, bul másele boyınsha  Suw xojalıǵı ministri B.Yusupov bayanat jasadı.

Bul másele de tolıq qarap shıǵıldı hám deputatlar tarepinen qarar qabıl etildi.

Sessiyada ózbasımshalıq penen iyelep alınǵan jer uchastkaları hám olarda qurılǵan imaratlar menen obektlerge bolǵan huqıqlardı tán alıw tuwralı másele de kórip shıǵıldı.

Prezidentimizdiń tikkeley baslaması menen tek ǵana Qaraqalpaqstan ushın 119-sanlı arnawlı párman qabıl etilip, usı tiykarda, qala hám rayonlardaǵı jámi 27 mıń 590 kadastr hújjeti bolmaǵan turaq jaylarǵa iyelik etiw huquqı berilgenin hám kadastr pasportları islep shıǵılıp, mámleketlik dizimnen ótkerilgenin atap ótiw kerek.

Bul iygilikli jumıslar ele de dawam ettirilip, «Ózbasımshalıq penen iyelep alınǵan jer uchastkalarına hám olarda qurılǵan imaratlar hám obektlerge bolǵan huqıqlardı tán alıw haqqında»ǵı Ózbekstan Respublikasınıń arnawlı Nızamı qabıl etildi.

Sessiyada usı nızam basshılıqqa alınıp, ózbasımshalıq penen iyelep alınǵan jer uchastkasına bolǵan ijara huqıqı jáne olarda qurılǵan imaratlar menen obektlerge bolǵan múlk huqıqı tán alınıp atırǵan 266 puqaranıń dizimi sessiya qararı menen tastıyıqlandı.

Sessiya májilisinde Joqarǵı Keńes Prezidiumınıń tiyisli qararları tastıyıqlandı.

Usınıń menen Qaraqalpaqstan Respublikası Joqarǵı Keńesiniń besinshi sessiyası óz jumısın juwmaqladı.

Qaraqalpaqstan xabar agentligi.