Málimlemedegi operativlik, tallawlardaǵı qalıslıq, tereń pikirlew – bulardıń barlıǵında sóz júgi, juwapkershilik jámlengen. Hár kúni mine usınday mashaqatlı hám maqtanıshlı wazıypanı orınlap kiyatırǵan taraw xızmetkerlerisiz jámiyetti kóz aldımızǵa keltiriw qıyın. Álbette, bul ǵalaba xabar quralları tarawınıń xızmetkerleri.

Ózbekstanda hár jılı 27-iyun – Baspasóz hám ǵalaba xabar quralları xızmetkerleri kúni sıpatında belgilenedi. Isbilermenler háreketi – Ózbekstan Liberal-demokratiyalıq partiyası Qaraqalpaqstan Respublikası Keńesinde de bayram múnásibeti menen ǵalaba xabar quralları xızmetkerleri kúnine baǵıshlanǵan ilaj bolıp ótti.
Ilajda Oliy Majlis Nızamshılıq palatasınıń deputatı, ÓzLiDeP frakciyasınıń aǵzası Gúljan Xalmuratova, Qaraqalpaqstan Respublikası Joqarǵı Keńesiniń komitet baslıǵı Sharap Otemisov hám ÓzLiDeP Qaraqalpaqstan Respublikası Keńesiniń apparat baslıǵı Adip Aybergenovlar shıǵıp sóylep, respublikamızda jumıs alıp barıp atırǵan bir qatar ǴXQ xızmetkerlerin bayram menen qutlıqladı.
– Búgingi kúnde jámiyetimizde ashıq-aydınlıqtı rawajlandırıw, mámleketlik uyımlar hám olardıń lawazımlı shaxslarınıń jumısı ústinen jámiyetlik qadaǵalawdı ornatıw, puqaralarımızdıń nızamlı múrájatların úyreniw hám sheshiw baǵdarında sizlerdiń ornıńız hám tásirińiz barǵan sayın artıp atırǵanın bárshemiz jaqsı bilemiz hám joqarı qádirleymiz, – dep atap ótti Oliy Majlis Nızamshılıq palatası. deputatı Gúljan Xalmuratova óz sózinde.
Atap aytqanda, qurılıs, ekologiya hám qorshaǵan ortalıqtı qorǵaw, jol háreketi qáwipsizligin támiyinlewdegi kemshilikler, sociallıq hám ekonomikalıq tarawlardaǵı mashqalalar boyınsha berilip atırǵan sın kózqarastan tallaw materialları orınlarda múlgip otırǵan ayırım basshı hám juwapkerlerdi uyqıdan oyatıp, jańasha islewge, adamlardıń táshwishi menen jasawǵa májbúr etpekte.
– Elimizde milliy baspasózdi rawajlandırıw, málimleme tarawın reformalaw, baspasóz hám sóz erkinligin támiyinlew, ǵalaba xabar qurallarınıń erkinligine erisiw jolında ámelge asırılıp atırǵan jumıslar tarawdıń rawajlanıwın jańa basqıshqa kóterdi. Qálem iyelerine bolǵan húrmet hám itibar arttı. Bunnan ruwxlanǵan taraw xızmetkerleri jáne de kúsh-ǵayrat penen jumıs alıp barmaqta – deydi “Erkin Qaraqalpaqstan” gazetasınıń juwaplı xızmetkeri Saǵındıq Janiev. – Hár qanday sharayatta da xalqımızdı jańalıqlardan, elimiz turmısı hám dúnyada júz berip atırǵan waqıyalardan xabardar etiwde jankúyerlik kórsetiwge háreket etemiz.
Haqıyqatında da, málimleme tarawın erkinlestiriw hám rawajlandırıw Jańa Ózbekstandı qurıw procesinde bárqulla tiykarǵı wazıypa bolıp kelmekte. Mámleketimizdiń jańalanǵan Konstituciyasında ǵalaba xabar qurallarınıń erkin jumıs alıp barıwın támiyinlew boyınsha áhmiyetli qaǵıyda hám principler bekkemlep qoyılǵanı, tarawǵa baylanıslı huqıqıy tiykarlar jetilistirilip atırǵanı bul pikirdi anıq tastıyıqlaydı.
Ásirese, sońǵı jılları elimizde sóz erkinligi hám pikirlerdiń hár túrliligine erisiw jolında keń imkaniyatlar ashılıp atırǵanı media wákilleriniń jámiyetlik-siyasiy processlerdegi qatnasıwı, ornı hám abırayın jáne de kúsheytpekte.
Ulıwmalastırıp aytqanda, jankúyer jurnalistlerimiz, belsendi blogerlerimiz ózleriniń qatań poziciyası, haqıyqıy sózi menen turmısımızdaǵı ótkir mashqalalardı sheshiw, reformalarımızdıń nátiyjesin arttırıw, watanlaslarımızdıń pikirin, dúnyaqarasın joqarılatıwǵa múnásip úles qospaqta. Álbette, bulardıń barlıǵı milliy media quralları “tórtinshi hákimiyat” dárejesine jaqınlasıp atırǵanınan dárek beredi.
Ilajda joqarı potencialı hám professionallıq sheberligi menen partiyamızdıń jumısın qalıs hám ádil sáwlelendirip, onıń xalıq arasında tanılıwın hám abırayın arttırıp, ideya hám maqsetlerin júzege shıǵarıwda pidákerlik penen miynet etip atırǵan bir qatar ǵalaba xabar quralları xızmetkerleriniń jumısı ayrıqsha tán alındı hám partiya tárepinen minnetdarshılıq bildirilip, bayram sawǵaları tapsırıldı.

Amangul ESEMURATOVA,
ÓzLiDeP Qaraqalpaqstan Respublikası Keńesi Jámiyetshilik penen baylanıslar, málimleme siyasatı hám ideologiyalıq isler bóliminiń baslıǵı

Qaraqalpaqstan xabar agentligi