Sońǵı jılları mámleketimizde milliy rawajlanıw strategiyamız tiykarında, bilimlendiriw sistemasında tariyxıy jańalanıwlar júz bermekte. Ózbekstan Respublikası Prezidenti Sh.Mirziyoev tárepinen tarawǵa baylanıslı kóplegen párman hám qararlar qabıllanıp, bul boyınsha huqıqıy baza bekkemlendi. Jańalanǵan Konstituciyamızda muǵallimniń statusı ayrıqsha belgilep qoyıldı.

Respublikamızda hár jılı jańadan bilimlendiriw dárgayları qurılıp, olardıń materiallıq-texnikalıq bazası, kadrlar potencialı jańalandı. Sabaqlıq hám oqıw qollanbalardıń zaman talaplarına say jańa áwladı jaratılmaqta.
Ásirese, mektepke shekemgi bilimlendiriw sisteması dúnyadaǵı aldınǵı tájiriybeler tiykarında, pútkilley jańasha rawajlanıw basqıshına qádem tasladı. Elimizdegi balalar baqshalar sanı 8 esege kóbeyip, balalardı qamtıp alıw 27 procentten 76,4 procentke jetkeni de joqarıdaǵı pikirimizdi tastıyıqlaydı.
Tariyxta birinshi márte 530 mektepte inklyuziv bilimlendiriw turmısqa engizildi. Qaraqalpaqstan Respublikası hám Xorezm wálayatında 288 mıńnan aslam baslawısh klass oqıwshılarınıń biypul awqatlanıwı jolǵa qoyıldı.
Elimizde júz berip atırǵan usınday iri ózgeris hám jańalanıwlardı qalıs hám ashıq-aydın sáwlelendiriwde baspasóz hám ǵalaba xabar quralları xızmetkerleriniń atqarıp atırǵan xızmeti ayrıqsha bolıp tabıladı.
«27-iyun-Baspasóz hám ǵalaba xabar quralları xızmetkerleri kúni» múnásibeti menen Qaraqalpaqstan Respublikası Mektepke shekemgi hám mektep bilimlendiriwi ministrliginde taraw pidayıları menen ushırasıw keshesi shólkemlestirildi.
Ushırasıwda Qaraqalpaqstan Respublikası Mektepke shekemgi hám mektep bilimlendiriwi ministri Gúlistan Qojabaeva shıǵıp sóylep, sońǵı jılları mámleketimizde tálim-tárbiya sistemasın rawajlandırıw, tarawda reformalardı tabıslı ámelge asırıw, oqıw procesine milliy hám aldınǵı sırt el tájiriybelerin, innovaciyalıq, pedogikalıq hám málimleme-kommunikaciya texnologiyaların keńnen engiziw baǵdarındaǵı jumıslardıń barısı, respublikamız oqıwshıları hám pedagog-tárbiyashılarınıń qolǵa kirgizip atırǵan jetiskenlikleri haqqında keń túrde aytıp ótti hám qolǵa kirgizilip atırǵan bunday úlken tabıslardı keń jámiyetshilikke jetkeriwde ǵalaba xabar quralları xızmetkerleriniń atqarıp atırǵan xızmetlerin joqarı bahaladı.
Ilajda tarawdaǵı usınday ózgerisler hám jańalanıwlardı baspa sóz hám ǵalaba xabar qurallarında óz waqtında operativ hám qalıs túrde jetkerip atırǵan bir qatar taraw pidayıları múnásip túrde xoshametlendi.
-20 jıldan berli baspasóz tarawında qálem terbetip kelmektemen,-deydi sıylıqlanǵanlardıń biri Gúlnara Júginisova.-Meniń azı-kem islegen miynetim ministrlik basshıları tárepinen ılayıqlı bahalanıp, bayram aldında «Qaraqalpaqstan Respublikası Xalıq bilimlendiriwi aǵlası» kókirek belgisi menen sıylıqlandım. Bunıń ushın taraw basshılarına úlken raxmet aytaman. Aldaǵı waqıtları da ózime bildirilgen isenimdi aqlaw ushın, ele de kóbirek izlenip, xalıq iygiligi jolında xızmet ete beremen.

Adilbay Orazov,
Qaraqalpaqstan xabar agentligi sholıwshısı.