Ózbekstan xalıqaralıq maydandaǵı sawda-ekonomikalıq qatnasıqlardı izbe-iz rawajlandırıp, strategiyalıq sherikler menen ámeliy sóylesiwdi keńeytpekte. Bul processte Aziya regionındaǵı abıraylı sheriklerden biri – Malayziya menen qatnasıqlar ayrıqsha orın ieleydi.

Paytaxtımızda ótkerilgen Ózbekstan – Malayziya biznes forumı bul baǵdarda birge islesiw kólemin keńeytiwde úlken áhmiyetke iye boldı.

Onda Ózbekstan Respublikası Bas ministriniń orınbasarı – ekonomika hám qarjı ministri Jamshid Qwchqorov, Malayziya – Ózbekstan biznes keńesiniń prezidenti Dato Sri King Lim, Malayziya delegaciyası atınan Bas ministrdiń orınbasarı – energetika hám suw transformaciyası ministri Fadillah Yusuf shıǵıp sóylep, eki mámleket arasındaǵı sawda, sanaat, energetika, infrastruktura hám xızmetler tarawlarındaǵı birge islesiwdi bunnan bılay da keńeytiw imkaniyatlarına itibar qarattı.
Atap ótilgenindey, bul processte Ózbekstan – Malayziya biznes forumı eki mámleket arasındaǵı ekonomikalıq baylanıslardı bekkemlew, jańa investiciyalıq baǵdarlardı belgilew hám óz-ara paydalı birge islesiwdi rawajlandırıwda áhmiyetli platforma wazıypasın atqaradı.

Ánjumanda Ózbekstandaǵı ashıq hám investorlarǵa qolaylı ortalıq, investiciyalıq imkaniyatlar, ekonomikalıq reformalar hám jaratılıp atırǵan sharayatlar haqqında hár tárepleme maǵlıwmatlar berildi. Sonday-aq, tárepler óz-ara paydalı birge islesiwdi keńeytiw boyınsha bir qatar baǵdarlar boyınsha pikir alıstı.

Ilajdıń tiykarǵı bóliminde hár qıylı ministrlikler hám uyımlardıń wákilleri prezentaciyalar ótkerdi. Energetika tarawındaǵı reformalar, eki tárepleme sawda qatnasıqları, “jasıl energiya” tarawındaǵı baslamalar, Ózbekstannıń investiciyalıq ortalıǵı hám biznesti qollap-quwatlaw mexanizmleri sıyaqlı máseleler dodalandı.

Forum sheńberinde júzbe-júz sóylesiwge baǵdarlanǵan V2V ushırasıwları da shólkemlestirildi. Ózbekstan hám Malayziya isbilermen toparları arasında ámeliy birge islesiwdi jolǵa qoyıwǵa qaratılǵan usınıslar dodalandı, bir qatar kelisimlerge erisildi.

Sonday-aq, biznes-forum sheńberinde eki tárepleme rásmiy hújjetler almasıw máresimi bolıp ótti. Bul hújjetler jaqın keleshekte ámeliy joybarlardı baslaw hám institucionallıq sheriklikti rawajlandırıwǵa xızmet etedi.

Nasiba ZIYoDULLAEVA,
ÓzA xabarshısı