Prezident Shavkat Mirziyoev 18-iyun kúni “Tashkent-Shıǵıs” aeroportınıń qurılısın kózden ótkerdi.

Mámleket rawajlanıp, tartımlılıǵı artqan sayın sırtqı baylanıslar, investiciyalar aǵımı kóbeyip baradı. Usınday ekonomikalıq ósiw pátin esapqa alıp, elimizde transporttıń barlıq tarmaqları rawajlandırılmaqta. Bul, óz gezeginde, jáne isbilermenlik baylanıslarınıń jedellesiwine sharayat jaratpaqta.
Sonıń ishinde, “Tashkent-Shıǵıs” aeroportı da qayta qurılmaqta. Bárinen burın, 4 kilometr uzınlıqtaǵı ushıw-qonıw jolı jańalanıp, eń awır samolyotlardı da qabıl etiw quwatlılıǵına iye boldı. Házirgi kúnde joqarı mártebeli miymanlar hám biznes-aviaciya ushın 2 terminal, perron hám angarlar qurılmaqta.
Aeroport qolaysız hawa-rayı sharayatlarında da ushıw-qonıwdı támiyinleytuǵın ICAO III-A kategoriyasındaǵı aldınǵı radiotexnika hám meteorologiya úskeneleri menen támiyinlenedi. Jabıq angarlarda samolyotlar saz hám qáwipsiz saqlanıwı ushın zamanagóy sharayatlar támiyinlenedi.
Eń áhmiyetlisi, qolaylı jaylasıwı menen aeroport paytaxtımız hám Jańa Tashkent qalası ushın perspektivalı port, Tashkent wálayatınıń turizm potencialında qosımsha abzallıq boladı.
Mámleketimiz basshısı aeroporttıń texnikalıq imkaniyatları, terminallardıń dizaynına baylanıslı prezentaciya menen tanıstı. Qurılıstı jedellestiriw, investorlarǵa sharayat jaratıw boyınsha kórsetpeler berildi.

ÓzA