Ózbekstan Respublikası Prezidentiniń qararı

Xalqımızǵa tán miyrim-shápáát, adamgershilik, shúkirshilik, saqawat hám keńpeyillik sıyaqlı jaqsı pazıyletlerdiń tımsalı bolǵan, ásirler dawamında ruwxıy turmısımızda áhmiyetli orın iyelep kiyatırǵan múbárek Qurban hayıtınıń áhmiyeti Jańa Ózbekstanda sociallıq mámleket qurıw processleri sheshiwshi basqıshqa kirip atırǵan búgingi sharayatta barǵan sayın artıp atırǵanın esapqa alıp hám usı qutlı áyyyamdı hár tárepleme múnásip kútip alıw hám ótkeriw, sonday-aq, milliy-diniy qádiriyatlarımızdı qásterlep-saqlaw hám ulıǵlaw maqsetinde qarar etemen:
1. 2025-jılı múbárek Qurban hayıtınıń birinshi kúni 6-iyun- juma kúnine tuwra keliwi haqqında Ózbekstan musılmanları basqarmasınıń málimlemesi maǵlıwmat ushın qabıl etilip, mámleketimizde 6-iyun Qurban hayıtı sıpatında keńnen belgilensin.
2. Xalıqtıń Qurban xayıtı bayramın múnásip ótkeriw ushın qolaylı sharayatlar jaratıw maqsetinde 2025-jılı 7-iyun (shembi) kúni altı kúnlik jumıs háptesi tártibi boyınsha isleytuǵın xızmetkerler ushın qosımsha dem alıs kúni etip belgilensin.
3. Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri Din isleri boyınsha komitet, Ózbekstan máhálleri associaciyası, Sociallıq qorǵaw milliy agentligi hám basqa birge islesiwshi shólkemler menen birgelikte aymaqlarda Qurban hayıtın xalqımızdıń milliy dástúr hám úrp-ádetlerine sáykes túrde ótkeriw boyınsha tiyisli ilajlardı ámelge asırsın.
4. Turizm komiteti Transport ministrligi menen birgelikte watanlaslarımız ushın Qurban hayıtı kúnlerinde muqaddes zıyarat orınları hám tariyxıy orınlarǵa zıyaratlardı shólkemlestiriw maqsetinde qolaylı sharayat hám imkaniyatlar jaratsın.
5. Ózbekstan Milliy teleradiokompaniyası, Ózbekstan Milliy málimleme agentligi hám basqa ǵalaba xabar qurallarına Qurban hayıtın belgilewge baylanıslı ilajlardı keńnen sáwlelendiriw usınıs etilsin.
6. Usı qarardıń orınlanıwın qadaǵalaw Ózbekstan Respublikası Bas ministri A.N. Aripov hám Ózbekstan Respublikası Prezidentiniń keńesgóyi R.Q Davletovqa júklensin.

Ózbekstan Respublikası
Prezidenti Sh.MIRZIYoEV

Tashkent qalası,
2025 -jıl 30-may