Paytaxtımızda “Tashkent Law Spring” tórtinshi xalıqaralıq yuridikalıq forumı óz jumısın dawam ettirmekte.

Sanlı dáwirde huqıq sisteması reformasına baǵıshlanǵan abıraylı ilajda 1,2 mıńǵa jaqın qatnasıwshı, sonıń ishinde, 150 ge shamalas sırt elli spiker hám rásmiyler, 40 tan aslam mámleketlik hám xalıqaralıq shólkemlerdiń wákilleri qatnaspaqta. Saudiya Arabstanı, BAÁ, Pakistan, Rossiya, Ázerbayjan, Qırǵızstan sıyaqlı mámleketlerdiń ádillik uyımlarınıń basshıları, Singapur Bas prokurorı, sonday-aq, “Jer júzilik ádil sudlaw joybarı” atqarıwshı direktorı qatnaspaqta.
Ilajdıń ashılıwında mámleketimiz basshısı Shavkat Mirziyoevtiń “Tashkent Law Spring” tórtinshi xalıqaralıq yuridikalıq forumı qatnasıwshılarına qutlıqlawın Prezident keńesgóyi Ruslanbek Davletov oqıp esittirdi.
Qutlıqlawda ánjumanda dúnyanıń abıraylı shólkemleri hám 40 tan aslam mámleketten joqarı mártebeli delegatlar, jetekshi joqarı oqıw orınları hám “aqıl orayları”nıń belgili ilimpazları menen ekspertleriniń qatnasıp atırǵanı onıń abırayı hám áhmiyeti barǵan sayın artıp atırǵanın ayqın kórsetip atırǵanı atap ótildi.
“Joqarı texnologiyalıq rawajlanıw procesinde insan mápleri hám ádillik principlerine ámel etiw, nátiyjeli huqıqıy mexanizmlerdi jaratıw, sanlı suverenitetti támiyinlew boyınsha xalıqaralıq birge islesiwdi hár tárepleme kúsheytiwdi dáwirdiń ózi talap etpekte. Texnologiyalar hám virtual qatnasıqlar jedellik penen turmısımızǵa kirip atırǵan búgingi kúnde jasalma intellekt sıyaqlı rawajlanıwdıń eń aldınǵı jetiskenliklerinen ulıwma insaniyattıń mápleri jolında aqılǵa uǵras hám nátiyjeli paydalanıw zárúr, dep esaplaymız,” dep atap ótken mámleketimiz basshısı.
Jańa Ózbekstanda sanlı texnologiyalar járdeminde mámleketlik basqarıwdı modernizaciyalaw hám mámleketlik xızmetlerdi elektronlastırıw, ashıq-aydınlıqtı támiyinlew esabınan “xızmet kórsetiwshi mámleket” principin ámelge asırıwǵa úlken itibar qaratılıp atırǵanı aytıp ótildi. Ánjuman sheńberinde birinshi márte Jaslar forumı ótkerilip atırǵanı da dıqqatqa ılayıq ekeni atap ótildi.
Forum sheńberinde 20 ǵa shamalas ilaj, sonıń ishinde, plenar sessiya, sheberlik sabaqları, dógerek sáwbetleri, 4 kórgizbe, sonday-aq, birinshi márte Xalıqaralıq jaslar yuridikalıq forumı ótkeriletuǵının aytıp ótiw kerek.
Ilajlarda zamanagóy texnologiyalardıń huqıqıy sistemaǵa tásiri, elektron húkimet, sanlı notariat, yuridikalıq bilimlendiriwdegi revolyuciyalıq jańalıqlar, intellektuallıq múlkti qorǵaw, yuridikalıq ámeliyattı sanlastırıw sıyaqlı temalar dodalanadı.
Huqıqıy processlerdi avtomatlastırıw, smart-shártnamalardı engiziw, kiberqáwipsizlikti támiyinlew jáne sanlı mediaciya hám sud ekspertizası baǵdarındaǵı aldınǵı tájiriybeler úyreniledi.
Forum óz jumısın dawam ettirmekte.

N.Abduraimova,
N.Haydarov (súwret), ÓzA