Nókis qalasındaǵı 23-sanlı ulıwma bilim beriw mektebinde de bıyılǵı 11-klass pitkeriwshileri ushın umıtılmas pitkeriw keshesi shólkemlestirildi.

Ilaj mektep jámááti, ata-analar hám oqıwshılardıń qatnasıwında kóterińki ruwxta bolıp ótti.
Bıyıl jámi 115 oqıwshı bul mektepti tamamlap, úlken ómirge qaray isenimli qádem taslawǵa tayarlıq kórmekte. Olardıń arasında 2 pitkeriwshi óziniń joqarı bilimi hám umtılıwı menen altın medalǵa iye boldı.
Keshede mektep direktorı hám basqalar shıǵıp sóylep, jurtbasshımızdıń pitkeriwshilerge arnalǵan qutlıqlawın oqıp esittirdi. Ustazlar hám ata-analar jaqsı tileklerin bildirdi. Pitkeriwshilerdiń eń jaqsı pazıyletleri atap ótilip, jańa turmısqa qádem qoyıp atırǵanlıǵınan quwanıshlı ekenligin bildirdi. Pitkeriwshiler de ustazlarına minnetdarshılıq bildirdi.
Ilaj oqıwshılar tárepinen tayarlanǵan saxnalıq kórinisler, ayaq oyınlar hám qosıqlar menen dawam etti.
Bul ilaj pitkeriwshilerdiń mekteptegi sońǵı kúnlerin quwanısh hám maqtanısh sezimleri menen juwmaqlawǵa imkaniyat berdi.

Biybisara Jartıbaeva, QMU 1-kurs magistrantı.
Qaraqalpaqstan xabar agentligi