Bul usı jıldıń 5-maydaǵı «Talantlı qánigelerdiń sırt elde bilim alıwın qollap-quwatlaw, olarda kásiplik kónlikpelerdi rawajlandırıw hám xoshametlewge baylanıslı qosımsha ilajlar haqqında»ǵı Prezident pármanında názerde tutılǵan.

Pármanǵa bola, «El-yurt umidi» qorı Ózbekstan Respublikası Prezidenti janındaǵı Perspektivalı kadrlardı tayarlaw boyınsha «El-yurt umidi» qorı etip qayta shólkemlestirildi.
«El-yurt umidi» qorınıń tiykarǵı wazıypaları professional, tereń bilimge iye, zamanagóy pikirleytuǵın hám watansúyiwshilik ruwxında tárbiyalanǵan kadrlarǵa talaptı úyrenip barıwdan ibarat.
Stipendiyatlardıń Ózbekstanǵa qaytqannan soń jumıs islewi hám sociallıq qorǵaw ushın múnásip sharayatlar jaratıw hám olardı qollap-quwatlaw boyınsha usınıslar kirgiziw tiykarǵı wazıypalardan biri esaplanadı. Sonıń menen birge, mámleketimizdiń xalıqaralıq maydandaǵı unamlı imidjin jáne de arttırıw ushın stipendiyalar potencialınan paydalanıw názerde tutılǵan.
2025-jıl 1-sentyabrden baslap, ministrlik, uyım, ekonomika tarmaqlarınıń strategiyalıq kárxanaları arasınan maqsetli stajirovkaǵa jiberiletuǵın talabanlar dizimi qáliplestiriledi.
Stajirovka shólkemlestiriletuǵın sırt el shólkemleri hám stajirovka múddeti buyırtpashılar, Mámleketlik xızmetti rawajlandırıw agentligi hám «El-yurt umidi» qorı tárepinen belgilenedi.
Maqsetli stajirovkaǵa jiberiletuǵın qánigelerdiń stajirovka ótewde zárúr bolatuǵın shet tilin úyreniwi ushın ministrlik, uyım hám ekonomika tarmaqlarınıń strategiyalıq kárxanaları tárepinen tiyisli sharayatlar jaratıp beriledi.
Pármanǵa muwapıq, bakalavriat, magistratura hám doktorantura baǵdarlamaları boyınsha bilim alıw ushın múnásip talabanlardı tańlaw maqsetinde Ózbekstan Respublikası Prezidentiniń «El-yurt umidi» stipendiyası engiziledi.
«El-yurt umidi» stipendiyası jeńimpazları ashıq tańlaw tiykarında test sınaqları hám sáwbet ótkeriw arqalı anıqlanadı. Test sınaqlarında talabanlardıń intellektuallıq, tallaw hám kreativlik qábiletleri, psixologiyalıq turaqlılıǵı bahalanadı.
Bakalavriat boyınsha jáne magistratura hám doktorantura boyınsha xalıqaralıq reyting shólkemleriniń global reytingi nátiyjelerine bola, birinshi júzlikke kirgizilgen sırt el joqarı bilimlendiriw hám ilimiy-izertlew mákemeleriniń bilimlendiriw baǵdarlamaları boyınsha oqıw qárejetleri (tuition fee) tolıq qaplanatuǵın grant tiykarında qabıl etilgen talabanlarǵa «El-yurt umidi» qorınıń stipendiyaları tańlawlarsız ajıratıladı;
Birinshi 300 likke kirgizilgen sırt el joqarı bilimlendiriw hám ilimiy-izertlew mákemelerine qabıl etilgen talabanlarǵa xalıqaralıq transport hám turaq jay qárejetleri ushın «El-yurt umidi» qorınıń stipendiyaları tańlawlarsız ajıratıladı;
Birinshi 20 lıqqa kirgizilgen sırt el joqarı bilimlendiriw mákemeleriniń bakalavriat tálim baǵdarlamaları boyınsha oqıw qárejetleri (tuition fee) keminde 50 procent qaplanatuǵın grant tiykarında qabıl etilgen Prezident, dóretiwshilik hám qánigelestirilgen mekteplerdiń pitkeriwshilerine «El-yurt umidi» qorınıń stipendiyaları tańlawlarsız ajıratıladı.

Qaraqalpaqstan xabar agentligi