9-may – Eslew hám qádirlew kúni

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Eslew hám qádirlew kúni múnásibeti menen Ekinshi jer júzilik urıs qatnasıwshıları Qadirbay Narmanov hám Mariya Ivanovna, sonday-aq, front artında miynet etken Ráwshan Samarkanova, ataqlı mámleketlik hám jámiyetlik ǵayratker, Miynet Qaharmanı Qállibek Kamalovtıń shańaraǵında bolıp, bayram sawǵaların tapsırdı.
Veteranlardı 9-may – Eslew hám qádirlew kúni ulıwmaxalıqlıq bayramı, sonday-aq, Ekinshi jer júzilik urısta fashizm ústinen erisilgen jeńistiń 80 jıllıǵı menen qızǵın qutlıqlap, Ózbekstan Respublikası Prezidentiniń bayram qutlıqlawı oqıp esittirildi.
Ushırasıwlarda jeńiske úles qosqan qaharmanlar, front artında xızmet etken veteranlar, elimizdiń rawajlanıwı jolında miyneti sińgen nuranıylardıń iygilikli isleri barqulla eske alınıp, olarǵa húrmet kórsetiletuǵınlıǵı atap ótildi.
Prezidentimizdiń tapsırması tiykarında Ekinshi jer júzilik urıs qatnasıwshılarına 10 mıń dollar muǵdarında bir mártelik aqshalay sıylıq, veteranlarǵa da qarjılay sıylıqlar tapsırıldı. Sonday-aq, Prezident sawǵaları, Qaraqalpaqstan Respublikası Joqarǵı Keńesi, Ministrler Keńesi, Arqa-Batıs áskeriy okrugi, Nókis qalası hákimligi hám bir qatar shólkemlerdiń atınan da bahalı sawǵalar tapsırıldı.
Álbette, jawıngerlerimiz hám olar menen bir qatarda front artında miynet etken veteranlar, xalqımızdıń iygiligi jolında ayanbay xızmet etken miynet qaharmanlarınıń erlik isleri, úlken isenim hám sabır-taqatı búgingi hám keleshek áwlad ushın ibrat úlgisi bolıp xızmet etedi.
Orınlarda bayramǵa baǵıshlanǵan ilajlar dawam etpekte.

Qaraqalpaqstan xabar agentligi