Bunnan 80 jıl burın tariyxta óziniń úlken shıǵınları, ayanıshlı waqıyaları, neshshe analardıń kóz jasları menen tereń iz qaldırǵan Ekinshi jer júzilik urıstıń awır aqıbetleri hám urıstan sońǵı mashaqatlı jıllar xalqımızdıń yadında máńgi saqlanıp kelmekte. Urıs qatnasıwshıları hám front artında miynet etkenlerdi húrmetlew, olardıń xızmetlerin bahalaw maqsetinde Prezidentimiz tárepinen arnawlı qarar tiykarında «Ekinshi jer júzilik urıstaǵı jeńistiń 80 jıllıǵı» estelik yubiley medalı shólkemlestirilip, orınlarda olardı óz iyelerine tapsırıw ilajları ótkerilmekte. Taqıyatas rayonında da juwapker xızmetkerlerdiń qatnasıwında rayonda jasawshı front artında miynet etken nuranıy kekselerdiń jaǵdayınan xabar alınıp, olarǵa «Ekinshi jer júzilik urıstaǵı jeńistiń 80 jıllıǵı» estelik yubiley medalları tapsırıldı.
Urıstıń qıyınshılıqların óz kózi menen kórgen, awır kúnlerin basınan ótkergen nuranıylardıń biri Taqıyatas rayonında jasawshı Avezjan Atajanova bıyıl 98 jastı qarsılamaqta.
-Urıs jılları hám urıstan sońǵı jıllar xalqımız ushın awır kúnler boldı. Joqshılıq, qıyınshılıq jıllardı óz kózimiz benen kórdik. Házir Allaǵa shúkir, elimiz tınısh, toqshılıq zamanda jasap atırmız. Biz kekselerge usınday húrmet kórsetip atırǵan Prezidentimiz, el basshılarımız aman bolsın,-deydi Avezjan Atajanova biz benen sáwbette.

Qaraqalpaqstan xabar agentligi