Tashkenttegi Xalıqaralıq biznes orayında Oraylıq Aziyada náshebentlik zatlardıń tarqalıwınıń aldın alıw boyınsha Evropa Awqamınıń «CADAP» baǵdarlaması sheńberinde mámleketimizdiń tiyisli ministrlikleri menen uyımlarına arnawlı texnika hám úskenelerdi tapsırıw máresimi bolıp ótti.

Ilajǵa Ózbekstandaǵı Evropa Awqamı delegaciyasınıń wákilleri, «CADAP» baǵdarlamasınıń basshıları hám qánigeleri, Ishki isler, Densawlıqtı saqlaw ministrlikleri, Náshebentlik zatlardı qadaǵalaw komiteti, «Máhálle» qayırqomlıq jámiyetlik fondı hám Náshebentlik zatlardı qadaǵalaw milliy orayınıń wákilleri qatnastı.
Narkotiklerdi qadaǵalaw milliy orayınıń direktorı Ravshan Mamatov náshebentlikke qarsı gúresiw tarawında kórsetilip atırǵan hár tárepleme járdem ushın Evropa Awqamı wákillerine minnetdarshılıq bildirdi.
2001-jılı iske qosılǵan «CADAP» baǵdarlaması Evropa Awqamınıń baslaması bolıp, ol Oraylıq Aziya mámleketlerinde náshebentlik zatlardıń nızamsız aylanısına hám olardıń Evropa mámleketlerine tranzitine qarsı gúresiwde huqıq qorǵaw uyımlarınıń háreketlerin birlestiriwge qaratılǵan.
Ótken dáwir ishinde bul baǵdarlama sheńberinde 800 den aslam jergilikli qánige Evropa mámleketleriniń jetekshi mákemelerinde hám qánigelesken xalıqaralıq oraylarında qánigeligin arttırıp, tájiriybe almastı.
Ózbekstan Evropa Awqamı mámleketleri menen jedel rawajlanıp atırǵan birge islesiwdi joqarı qádirleydi. Bul birge islesiw tek ǵana siyasiy tarawda emes, al jınayatshılıq hám náshebentlikke qarsı gúresiw baǵdarında da bekkemlenbekte. Bul baǵdarda óz-ara paydalı hám sistemalı birge islesiw dawam ettiriledi.
«CADAP – 7» baǵdarlamasınıń direktorı Ernest Robello usınılǵan arnawlı texnika hám úskeneler tek ǵana tiyisli uyımlardıń analitikalıq hám texnikalıq potencialın kúsheytip qoymastan, birge islesiwdi jáne real waqıt rejiminde maǵlıwmat almasıwdı támiyinlew ushın qosımsha sharayatlar jaratadı.
Qatnasıwshılar sintetikalıq náshebentlik quralları tarqalıwınıń keskin artqanı hám bul tarawda internet tarmaǵı, messendjerler hám anonim tólem sistemalarınan belsene paydalanılıp atırǵanı menen baylanıslı zamanagóy qáwip-qáterlerge ayrıqsha itibar qarattı.
Ilaj juwmaǵında tárepler «CADAP» baǵdarlaması sheńberinde Ózbekstan hám Evropa Awqamı mámleketleri arasındaǵı birge islesiwdi bunnan bılay da rawajlandırıw, transmilliy náshebentlik jınayatshılıqqa qarsı nátiyjeli gúresiwge imkaniyat jaratıwǵa isenim bildirdi.

N.Abduraimova, ÓzA