Ózbekstan Respublikası Densawlıqtı saqlaw ministrligi tárepinen elimiz boylap ótkerilip atırǵan “Salamatlıq aylıǵı” sheńberindegi ilajlar nátiyjeli dawam etpekte. Aylıq sheńberinde elimizde xalıqtıń salamatlıǵın bekkemlewge qaratılǵan bir qatar iygilikli jumıslar ámelge asırılmaqta. Mine, usınday iygilikli jumıslardıń biri Qaraqalpaqstandaǵı medicina institutınıń klinikasında da ótkerildi.
Usı ilajlar sheńberinde Akademik V.Vahidov atındaǵı Respublikalıq qánigelestirilgen xirurgiya ilimiy-ámeliy medicina orayınıń Tuwma júrek nuqsanları bóliminiń baslıǵı, kardioxirurg Umid Murodovtıń basshılıǵındaǵı qánigeli shıpakerler jámááti institutqa kelip, júreginde tuwma nuqsanı bolǵan balalardı kózden ótkerdi.
Jámi 40 qa shamalas bala tereń medicinalıq tekseriwden ótkerildi. Olardıń arasınan júrek nuqsanı anıqlanǵan balalar tańlap alındı hám biypul xirurgiyalıq operaciyalar baslap jiberildi.
Házirgi waqıtta 10 balaǵa júrek nuqsanların emlew ushın ámelge asırılatuǵın operaciyalardıń reje-grafigi dúzilgen. Bunday qayırqomlıqqa tiykarlanǵan joqarı insanıylıq baslamalar, álbette, kóplegen shańaraqlarǵa úmit baǵıshlamaqta.
Bul ilaj tek ǵana medicinalıq jaqtan emes, al jámiyette awızbirshilik hám keńpeyillik pazıyletlerin bekkemlewde de úlken áhmiyetke iye ekenin atap ótiw kerek.
“Salamatlıq aylıǵı” sheńberindegi bunday ámeliy jumıslar jaqsılıq, miyrim-shápáát hám shıpa úlestiriw jolındaǵı áhmiyetli qádemler bolıp esaplanadı.

Qaraqalpaqstan xabar agentligi