Joqarı bilimlendiriw, ilim hám innovaciyalar ministrligi delegaciyası Qıtay Xalıq Respublikası Sinczyan-Uyǵur avtonom rayonına saparı dawamında birge islesiw kólemin jáne de keńeytiw, perspektivalı baǵdarlarda investiciyalıq joybarlardı ámelge asırıw maqsetinde bir qatar ushırasıwlar ótkerdi.

Atap aytqanda, «Tyanfen» awıl xojalıǵı ilimiy-texnikalıq kompaniyası menen azıq-awqat qáwipsizligin támiyinlewge járdemlesetuǵın laboratoriya orayın ashıwǵa kelisip alınıp, tiyisli kelisimge qol qoyıldı. Birlesken Milletler Shólkemi Sawda hám rawajlanıw boyınsha komissiyası (UNCTAD) eksperti hám «Space Techtronic Industries Services (Shenzhen) Co., Ltd.» wákilleri menen Qıtaydan Ózbekstanǵa aldınǵı texnologiyalardı alıp kiriw processlerin muwapıqlastırıwshı oray shólkemlestiriw boyınsha kelisimge erisildi.
Bunnan tısqarı, «Xinjiang Beixin Road & Bridge Group Co.Ltd» kompaniyası menen akademiyalıq almasıw baǵdarlamaların ámelge asırıw máselesi dodalandı. Tyanszin awıl xojalıǵı universiteti menen birgelikte agrar ilimiy izertlew orayın shólkemlestiriw, «Jańa Ózbek-Qıtay landshaft dizaynı» koncepciyasın islep shıǵıw boyınsha sóylesiwler alıp barıldı. CHanan universiteti menen xalıqaralıq birge islesiwdi rawajlandırıw hám studentler almasıwı baǵdarlamaları sheńberinde tórt bakalavriat baǵdarınıń hár biri boyınsha 30 studentke shekem qabıl etiw rejelestirilgen.
Sonday-aq, Tashkent ximiya-texnologiya institutı hám Sian neft universiteti arasında birgelikte ilimiy laboratoriya shólkemlestiriledi.
Pekin texnologiya institutı tárepinen Tashkent qalasında sırt el filialın ashıw máselesi de dodalandı. Jańa kampus quramında bes tiykarǵı fakultet – kompyuter ilimleri, mashina qurılısı hám avtomobil qurılısı, “jasıl” energetika, iri kólemli maǵlıwmatlar, jasalma intellekt hám kiber qáwipsizlik baǵdarları jumıs alıp barıwı názerde tutılmaqta.
Bir sóz benen aytqanda, joqarı bilimlendiriw sistemaları sherikliginiń kólemin jáne de keńeytiwge qaratılǵan bul háreketler Ózbekstan hám Qıtay arasındaǵı baylanıslardı bekkemlewge xızmet etedi, ilim, texnologiya, bilimlendiriw tarawların rawajlandırıw ushın jańa imkaniyatlar jarattı.

M.Sayfullaev, ÓzA