Hámmege belgili, keyingi waqıtlarda bank kartalarınan paydalanǵan halda urlıq hám aldawshılıq jaǵdayları kóbeyip barmaqta. Kommerciyalıq bankler, tólem sistemalarınıń operatorları hám tólem shólkemlerinde, áne, usınday huqıqbuzarlıqlardıń aldın alıwdıń zamanagóy usıllarına mútájlik payda bolmaqta. Atap aytqanda, antifrod, biometriyalıq identifikaciya hám basqa qorǵaw mexanizmlerin shólkemlestiriw zárúr.

Oliy Majlis Nızamshılıq palatasındaǵı Ózbekstan Ekologiyalıq partiyası frakciyasınıń gezektegi májilisinde, áne, usı máseleniń sheshimine qaratılǵan nızam joybarı dodalandı. Oǵan bola, antifrod hám biometriyalıq identifikaciya sistemalarınan paydalanıw minneti engiziledi. Oraylıq bank tárepinen ruqsat etilmegen tólemler anıqlanǵanda, bank kartaları hám mobil qosımsha akkauntlarınan paydalanıwdı úsh kúnge shekem sheklew haqqında tólem xızmetlerin kórsetiwshilerge kórsetpe jiberiliwine baylanıslı wákillik beriliwi múmkin.
Sonday-aq, tólem xızmetleri bazarın tártipke salıw maqsetinde bankler, tólem shólkemleri hám olardıń tólem agentleri hám subagentlerine ruqsat etiletuǵın tólem xızmetleriniń túrleri ayrıqsha belgilenbekte. Bank plastikalıq kartalarınan tólemlerdi ámelge asırıwda qadaǵalawdı kúsheytiw usınıs etilmekte.
Frakciya aǵzaları nızam joybarınıń áhmiyetli ekenligin tán alǵan halda óz pikir – usınısların bildirdi. Sonday-aq, májilis kún tártibindegi basqa máseleler de hár tárepleme kórip shıǵılıp, frakciyanıń tiyisli qararı qabıl etildi.

Muhtarama Komilova, ÓzA