Búgin Tashkentte ǴMDA Ekonomikalıq keńesiniń 105-májilisi bolıp ótti.

Oǵan ǴMDA Ekonomikalıq keńesiniń basshılıǵı hám onıń aǵzaları jáne delegaciyalardıń basshıları qatnastı.
Májilis basında ǴMDA Ekonomikalıq keńesiniń aǵzası, Ózbekstan Respublikası Bas ministriniń orınbasarı – ekonomika hám qarjı ministri Jamshid Qwchqorov shıǵıp sóyledi.
Májilisti ǴMDA Ekonomikalıq keńesiniń baslıǵı, Tájikstan Respublikası Bas ministriniń birinshi orınbasarı Xokim Xoliqzoda ashıp berdi hám ilajdı alıp bardı. Bunnan keyin ǴMDA Bas xatkeri Sergey Lebedev májilis kún tártibi menen tanıstırdı.
Májilis dawamında ǴMDAǵa aǵza mámleketlerdiń ekonomikalıq birge islesiwine baylanıslı keń kólemli máseleler dodalandı.
Onda shıǵıp sóylegenlerdiń atap ótiwinshe, ǴMDAǵa aǵza mámleketler arasında ekonomikalıq birge islesiwdi jańa basqıshqa alıp shıǵıw, regionallıq awızbirshilikti bekkemlew hám ulıwma rawajlanıw jolında óz-ara muwapıqlasqan háreketlerdi ámelge asırıwǵa xızmet etedi. Májiliste dodalanǵan hám maqullanǵan hújjetler, atap aytqanda, investiciyalıq ortalıqtı jaqsılaw hám transport-logistika sistemaların sáykeslendiriwge qaratılǵan baslamalar, keleshekte ekonomikalıq turaqlılıqtı hám básekige shıdamlılıqtı támiyinlewde áhmiyetli orın iyeleydi.
Ilajda 2030-jılǵa shekemgi dáwirde ǴMDA sheńberinde óz-ara investiciyalardı tartıw hám rawajlandırıwdı xoshametlew boyınsha ilajlar kompleksi tastıyıqlandı. Bul hújjet Ózbekstan Respublikası Prezidenti Shavkat Mirziyoevtiń baslaması menen islep shıǵılǵan bolıp, investiciyalıq ortalıqtı jaqsılaw, ǴMDAǵa aǵza mámleketlerdiń ekonomikasına óz-ara tikkeley sırt el investiciyalarınıń aǵımın kóbeytiw hám investiciyalardı tartıw nátiyjeliligin arttırıw boyınsha birge islesiwdi rawajlandırıwǵa qaratılǵan.
Ekonomika hám qarjı ministrliginiń bólim baslıǵı Alisher Ywldoshevtiń maǵlıwmat beriwinshe, ǴMDA Ekonomikalıq keńesiniń májilisi Ózbekstanda birinshi márte ótkerildi.
– Ádette, bul shólkemniń ilajları Moskva qalasında shólkemlestiriletuǵın edi. Usı jıldan baslap, ǴMDAǵa aǵza mámleketlerdiń baslamaları tiykarında bul májilislerdi túrli mámleketlerde ótkeriw ámeliyatı engizildi. Ótken jılı ǴMDA mámleketleri basshılarınıń májilisi sheńberinde Ózbekstan Respublikası tárepinen 105-májilisti Tashkent qalasında ótkeriw baslaması alǵa qoyılǵan edi. Usı baslama sheńberinde búgingi májilis shólkemlestirildi. Májilis kún tártibine ǴMDA mámleketleri arasındaǵı birge islesiwdi keńeytiwge baylanıslı 20 áhmiyetli másele kirgizildi hám olar hár tárepleme kórip shıǵıldı. Májilis juwmaǵında 19 áhmiyetli hújjetke qol qoyıldı. Bul hújjetler arasında investiciyalardı xoshametlew boyınsha “Jol kartası,” sonday-aq, aymaqlararalıq birge islesiwdi rawajlandırıwǵa qaratılǵan “Jol kartası” da bar ekenligin atap ótiw kerek. Bul hújjetler Ózbekstannıń baslaması menen islep shıǵıldı.
Sonday-aq, májiliste delegaciyalardıń basshıları ǴMDAǵa aǵza mámleketlerdiń hawa háreketin shólkemlestiriw milliy sistemaların sáykeslendiriw koncepciyasınıń joybarın maqulladı. Koncepciya ǴMDAǵa aǵza mámleketlerdiń hawa aymaǵınan paydalanıwınıń ekonomikalıq nátiyjeliligin arttırıw, xalıqaralıq aeronavigaciya ushın “tınıq” shegaralardı támiyinlew hám hawa aymaǵınan paydalanıwshılarǵa birden-bir qaǵıydalar hám texnologiyalar tiykarında xızmet kórsetiwge qaratılǵan. Bul ilajlardı ámelge asırıwdan kútilip atırǵan nátiyje – puqaralıq aviaciya hawa kemeleri párwazlarınıń qáwipsizligi, turaqlılıǵı hám únemliligin jáne hawa háreketine xızmet kórsetiwdiń sapasın arttırıwdan ibarat. Hújjet ǴMDA Húkimet basshıları keńesiniń dodalawına kirgiziledi.
Rossiya Federaciyası Densawlıqtı saqlaw ministriniń orınbasarı Andrey Plutnickiydiń atap ótiwinshe, bul ilaj ǴMDA mámleketleri arasında medicina tarawında birge islesiwdi bekkemlewge xızmet etedi.
– Búgingi májiliste densawlıqtı saqlaw tarawındaǵı birge islesiwdiń jańa koncepciyası dodalandı.
Ámeldegi koncepciya 20 jıldan berli paydalanılıp kiyatırǵanı sebepli, onı túp-tiykarınan qayta kórip shıǵıw zárúrligi bar. Biz dástúriy tárizde nátiyjeli birge islesiwdi jolǵa qoyǵanımızdı atap ótiw kerek. Biraq búgingi kúnde jańa rawajlanıw baǵdarları payda bolmaqta, atap aytqanda, telemedicina, ximiyalıq hám biologiyalıq qáwipsizlik máseleleri, sonday-aq, zamanagóy operaciyalardı densawlıqtı saqlaw sistemasına engiziw sıyaqlı áhmiyetli baǵdarlarda óz-ara baylanıslardı bunnan bılay da bekkemlew zárúr.
Biz aldımızǵa qoyǵan tiykarǵı maqset xalıqtıń turmısı hám densawlıǵın qorǵaw, birge islesiwshi mámleketlerdiń puqaraları ushın jáne de abadan turmıs sharayatın jaratıw bolıp esaplanadı. Búgin koncepciyanı bir awızdan maqullaw arqalı qabıl etilgen qarar dos mámleketler xalqınıń mápi jolında jáne de úlken imkaniyatlar ashatuǵınına isenemen. Koncepciyada hár bir qánigelesken baǵdar boyınsha birden-bir, biraq jedel engiziw mexanizmlerin qáliplestiriw zárúr ekenligi de anıq kórsetilgen,-dedi A.Plutnickiy.
Májilis juwmaǵında kórip shıǵılǵan máseleler boyınsha 19 áhmiyetli hújjetke qol qoyıldı. Bunnan soń ǴMDA Ekonomikalıq keńesiniń baslıǵı Hákim Xoliqzoda hám ǴMDA Bas xatkeri Sergey Lebedevtiń qatnasıwında baspasóz ánjumanı bolıp ótti.

Nasiba Ziyodullaeva, ÓzAnıń xabarshısı