Házirgi kúnde dúnya saxnasında payda bolıp atırǵan hár qıylı qáwip-qáterli jaǵdaylarda regionımızda tınıshlıq, qáwipsizlik hám turaqlılıqtı támiyinlew áhmiyetli máselelerden biri. Bul baǵdarda parlamentlerdiń birge islesiwin bekkemlew mámleketler arasındaǵı paydalı baylanıslardıń rawajlanıwına tiykar boladı.

Ázerbayjan paytaxtı Baku qalasında Túrkiy mámleketler parlamentleriniń qorǵanıw hám qáwipsizlik máselelri boyınsha komitetleri basshılarınıń ekinshi májilisi bolıp ótti. Túrkiy mámleketler Parlament Assambleyası (TúrkPA) mirát etiwine bola Ózbekstan Respublikası Oliy Majlisi delegaciyası da usı májiliste qatnastı. Bul haqqında Oliy Majlis Nızamshılıq palatası baspasóz xızmeti xabar berdi.
Xabarda atap ótilgenindey, bul ilajda túrkiy mámleketler arasında qorǵanıw hám qáwipsizlik tarawlarındaǵı birge islesiwdi jáne de bekkemlew, zamanagóy qáwip-qáterlerge qarsı gúresiwde parlamentlerdiń birge islesiwin rawajlandırıw arqalı awızbirshilikti támiyinlew, bul baǵdarda óz-ara paydalı hám nátiyjeli qatnaslardı islep shıǵıw sıyaqlı máseleler dodalandı.
Parlamentler wákilleri regionda tınıshlıq hám turaqlılıqtı támiyinlew, qáwipsizlikke qáwip salıwshı faktorlarǵa qarsı birgeliktegi háreketlerdi jáne de kúsheytiw, ulıwma qádiriyatlar, tariyxıy baylanıslar hám strategiyalıq mápler tiykarında óz-ara birge islesiwdi keńeytiw máselelerine ayrıqsha itibar qarattı.
Bul májilis túrkiy mámleketler arasındaǵı parlamentleraralıq birge islesiwdi jáne de rawajlandırıw, siyasiy-huqıqıy, qorǵanıw hám qáwipsizlik tarawlarındaǵı tatıwlıqtı támiyinlewge xızmet etiwi menen ayrıqsha áhmiyetke iye.

M.Komilova, ÓzA