Ózbekstanda 2025-jıldıń basınan berli quyash hám samal elektr stanciyaları tárepinen islep shıǵarılǵan elektr energiyasınıń kólemi 2 milliard kilovatt saatqa jetti. Bul haqqında energetika ministrliginiń málimleme xızmeti málim etti.

Atap ótiliwinshe, usı jıldıń 12-aprel kúni saat 15:30 jaǵdayına bola usı kórsetkishke erisilgen. Házirgi waqıtta mámlekettiń 10 wálayatında jámi 4067 megavatt quwatlılıqqa iye 11 quyash fotoelektr stanciyası hám 3 samal elektr stanciyası jumıs alıp barmaqta. Bul obektler qayta tikleniwshi energiya islep shıǵarıw arqalı milliy energetika sistemasında áhmiyetli orın iyelemekte.
Bizge belgili, Ózbekstanda qayta tikleniwshi energiya dereklerinen paydalanıwǵa baǵdarlanǵan baǵdarlama 2022-jılı ámelge engizilgen. Sol jılı Nawayı hám Samarqand wálayatlarındaǵı quyash stanciyaları tárepinen 434 million kilovatt saat, 2023-jılı bolsa 576,9 million kilovatt saat elektr energiyası islep shıǵarılǵan.
Usı jıldıń basınan berli quyash elektr stanciyaları 1 milliard 169,9 million kilovatt saat, samal elektr stanciyaları bolsa 830,1 million kilovatt saat elektr energiyasın islep shıǵardı. Bul kórsetkish 2024-jılı samal stanciyaları tárepinen islep shıǵarılǵan jámi elektr energiyası 799 million kilovatt saattan joqarı.
Islep shıǵarılǵan «jasıl» energiya esabınan 600 million kub metr tábiyǵıy gaz únemlendi. Sonday-aq, atmosferaǵa 1 million 176 mıń tonnadan artıq karbonat angidrid hám 1176 tonna azot oksidleri shıǵıwınıń aldı alındı.
Sonday-aq, 2025-jıldıń basınan 12-aprel saat 15:30ǵa shekem respublikamızdaǵı barlıq gidro, quyash hám samal elektr stanciyaları tárepinen jámi 3 milliard 707 million kilovatt saat elektr energiyası islep shıǵarıldı.
Bul kórsetkish esabınan 1 milliard 112,1 million kub metr tábiyǵıy gaz únemlendi, atmosferaǵa 2 million 179 mıń 716 tonna karbonat angidrid hám 2179,7 tonna azot oksidleri shıǵıwınıń aldı alındı.
Bul muǵdardaǵı elektr energiyası 4 million 633 mıń 750 xojalıqtıń tórt aylıq yamasa 1 million 544,6 mıń xojalıqtıń tolıq bir jıllıq energiya talabın qaplaw imkaniyatın beredi.

N.Ziyodullaeva, ÓzA