Parlamentleraralıq Awqamnıń 150-yubiley assambleyası tabıslı juwmaqlandı. Eń áhmiyetlisi, onda pútkil dúnya xalıqlarınıń turmısına baylanıslı hújjetler qabıl etildi.

ÓzAnıń xabarshısı Parlamentleraralıq Awqamnıń Bas xatkeri, Ózbekstan Respublikası «Dwstlik» ordeniniń iyesi Martin CHungong penen bul haqqında sáwbetlesti:
– Ózbekstan paytaxtında ótken tariyxıy assambleya Tashkent deklaraciyası menen juwmaqlanǵanınan júdá quwanıshlıman. Deklaraciya tek ǵana global parlament jámiyetshiliginiń kózqarasların emes, al bir neshe kún burın assambleyaǵa múrájat etken Ózbekstan Respublikası Prezidenti Shavkat Mirziyoevtiń pikirlerin de ózinde sáwlelendirdi.
Ullı mártebeli mırza kámbaǵallıqtan abadanlıqqa ótiw, kúshli sociallıq qorǵaw sistemaların qurıw, reformalar arqalı puqaralardıń turmısın jaqsılaw haqqında ayttı. Ózbekstandaǵı reformalarǵa ayrıqsha toqtap ótti.
Tashkent deklaraciyası biz ushın áhmiyetli hújjet bolıp, ol parlamentler aǵzalarına dúnya boylap adamlardıń abadanlıǵı jolında jáne de belsendi hám isenimli háreketlerge tiykar jarattı.
Tashkenttegi bul tájiriybe biz ushın ájayıp nátiyje boldı. Nesip etse, kelesi saparı jáne qaytamız. Bálkim, keyingi mánzilimiz – Samarqand bolar.
Bárshesi, joqarı dárejedegi shólkemlestiriw jumısları, joqarı itibar ushın sizlerge úlken raxmet!
Esletip ótemiz, mámleketimiz basshısınıń 2025-jıl 7-apreldegi «Martin Pukvareke CHungongtı Ózbekstan Respublikasınıń «Dwstlik» ordeni menen sıylıqlaw haqqında»ǵı pármanına tiykarlanıp, Ózbekstan Respublikası Parlamentleraralıq Awqam arasındaǵı hár tárepleme birge islesiwdi izbe-iz rawajlandırıw hám tereńlestiriw baǵdarında kóp jıllıq nátiyjeli jumısı, sociallıq-ekonomikalıq, mádeniy-gumanitarlıq tarawlardaǵı áhmiyetli birgeliktegi baǵdarlama hám joybarlardı ámelge asırıw, parlament diplomatiyası menen regionlararalıq baylanıslardı, ashıq hám konstruktiv siyasiy qarım-qatnastı ámelge asırıwǵa tikkeley úles qosqanı, sonday-aq, elimizdiń xalıqaralıq abırayın dúnya masshtabında kóteriwdegi ámeliy háreketleri ushın Parlamentleraralıq awqamnıń Bas xatkeri Martin Pukvareke CHungong Ózbekstan Respublikasınıń «Dwstlik» ordeni menen sıylıqlandı.

Norgul Abduraimova, ÓzA