Múnásibet

Konstituciya xaqqında sóz eter ekenbiz, eń dáslep xújjettiń xalqımız turmısındaǵı ornı hám roli, puqaralarımızdıń nızam menen qorǵalatuǵın xuqıqları menen erkinlikleriniń kepilligin támiyinlewdegi áhmiyeti, elimizde jasawshı hár qanday millet wákilleriniń milliy qádiriyatların qollap-quwatlaw baǵdarındaǵı ayrıqsha wazıypaların atap ótiwimiz lazım.

Bıyıl Qaraqalpaqstan Respublikası Konstituciyası qabıl etilgenligine 32 jıl toladı.

Ózbekstan Respublikasi Konstituciyasınıń 86-statyasına muwapıq, Qaraqalpaqstan Respublikası óz Konstituciyasına iye bolıwı kerek ekenligi belgilep qoyılǵan bolıp, 1993-jıl 9-aprel kúni XXVI bap hám 121-statyadan ibarat Qaraqalpaqstan Respublikası Konstituciyası qabıl etildi.
Elimizde jasawshı puqaralardıń turmıs tárizin jaqsılaw, huqıqları hám nızamlı máplerin qorǵaw, onı qádiriyat dárejesine kóteriw – Qaraqalpaqstan Respublikası Konstituciyasınıń da eń úlken maqseti bolıp esaplanadı.
Sońǵı jılları Prezidentimiz tárepinen Qaraqalpaqstan Respublikasına úlken dıqqat qaratılıp, puqaralardıń turmıs sharayatların ele de jaqsılaw maqsetinde keń kólemdegi jumıslar ámelge asırılmaqta.
Usınday baslamalar nátiyjesinde qısqa múddet ishinde respublikamızdıń jámiyetlik-siyasiy, sociallıq-ekonomikalıq tarawlarında úlken ózgerisler júz berip atırǵanlıǵın ayrıqsha atap ótiwimiz tiyis.
Ásirese, qaraqalpaqstanlı jaslarǵa, xayal-qızlarǵa, sonday-aq, isbilermenlerge jaratılıp atırǵan imkaniyatlar, kórsetilip atırǵan ǵamqorlıqlar negizinde olardıń ómirinde úlken burılıslar júz berip atırǵanlıǵına hár qádemde gúwa bolıp atırmız.
Sonday aq, zamanlaslarımızdıń jámiyette múnásip orın iyelewine ayrıqsha itibar qaratılıp, mámleketimizdiń rawajlanıwında pidákerlik penen qatnasıp atırǵan insanlardıń miynetleri múnásip bahalanıp atırǵanlıǵı bárshemizdi quwandıradı.
Mámleketimizde qabıl etilip atırǵan hár qanday nızam hám unamlı baslamalardıń mazmunı hám áhmiyeti Konstituciyamızda óz kórinisin tapqanlıǵın da atap ótiwimiz tiyis.
Solay eken, elimizde jasawshı hár bir puqara huqıq hám minnetlemelerin bilgen halda, nızamda belgilep berilgen juwapkershilikti tereń sezinip, elimizdiń rawajlanıwı jolında ayanbay xızmet etiwi maqsetke muwapıq.
Pursattan paydalanıp, bársheni Qaraqalpaqstan Respublikası Konstituciyası qabıl etilgenligine 32 jıl tolıwı múnásibeti menen shın júrekten qutlıqlayman.

Ruslan Djumamuratov,
Ózbekstan Respublikası Oliy Majlisi
Nızamshılıq palatasınıń deputatı.
Qaraqalpaqstan xabar agentligi