Qaraqalpaqstan Respublikası Joqarǵı Keńesiniń komitet baslıǵı M.Atamuratov házirgi waqıtta Koreya Respublikasında bolıp turıptı. Bul mámleketke saparı dawamında M.Atamuratov dáslep Bumhan Unisollutions kompaniyası wákilleri menen sóylesiwler alıp barıp, qayta tikleniwshi energiyadan nátiyjeli paydalanıw, jańa texnologiyalardı en jaydırıw, IT tarawın rawajlandırıw hám jumıssız puqaralardı kásipke baǵdarlaw boyınsha pikir alıstı.

Sonday-aq, eki tárepleme birge islesiwdi jolǵa qoyıw arqalı jańa joybarlar ústinde birge islesiw, tıǵız birge islesiw qatnasıqların bekkemlew hám basqa da usı sıyaqlı áhmiyetli máseleler sóz etildi.
Bunnan soń Sungshin hayallar universiteti wákilleri menen ushırasıw ótkerildi. Sóylesiwlerde Qaraqalpaqstandaǵı joqarı oqıw orınları menen birge islesiwlerdi, atap aytqanda, Qaraqalpaq mámleketlik universiteti menen koreys tilin úyreniw boyınsha jumıslardı jolǵa qoyıw máseleleri tuwralı sóylesiwler alıp barıldı.
Sonday-aq, studentlerdiń óz-ara tájiriybe almasıwı ushın sharayat jaratıw maqsetinde Qaraqalpaqstanda jazǵı lagerler shólkemlestiriw hám Koreya mámleketinen studentler hám professor-oqıtıwshılardı tartıw, bul arqalı region turizminiń rawajlanıwına da úles qosıw boyınsha pikir alıstı.
Ushırasıw dawamında oqıw ornı menen birge koreys tilin úyreniwdi en jaydırıw baǵdarında arnawlı kitapxanaǵa iye oray shólkemlestiriw, usı tiykarda til úyreniw kursların tabıslı tamamlap shıqqan studentlerdiń Koreya mámleketindegi joqarı oqıw orınlarında bilim hám tájiriybelerin arttırıwı ushın sharayat jaratıw baǵdarındaǵı ilajlar kelisip alındı.

Qaraqalpaqstan xabar agentligi