Ózbekstan Respublikası Prezidenti Shavkat Mirziyoev Qazaqstan Respublikası Prezidenti Qasım –Jomart Toqaevtiń mirát etiwine bola 29-mart kúni joqarı dárejedegi rásmiy emes ushırasıw ótkeriw ushın ámeliy sapar menen Almata qalasında boldı.

Mámleketimiz basshısın Qazaqstan Respublikası Prezidenti Qasım-Jomart Toqaev kútip aldı. Ózbekstan jetekshisiniń húrmetine húrmetli qarawıl sap tarttı hám eki mámleket bayraqları kóterildi.
Ózbekstan hám Qazaqstan – eń jaqın qońsı hám awqamlas mámleket bolıp esaplanadı. Olardıń qatnasıqları ulıwma doslıq hám jaqsı qońsıshılıq principleri tiykarında izbe-iz rawajlanbaqta.
Dáslep Ózbekstan Respublikası Prezidenti Shavkat Mirziyoev hám Qazaqstan Respublikası Prezidenti Qasım-Jomart Toqaev “Medeu” taw-lıja klasterine bardı.
Mámleketimiz basshısına sel-suw tasqınlarınan qorǵaw maqsetinde teńizden 1750 metr bálentlikte qurılǵan “Medeu” plotinasınıń jaratılıw tariyxı hám arxitekturalıq ózgeshelikleri haqqında aytıp berildi.
“Medeu” plotinasınıń tóbesine 842 teksheden ibarat “Salamatlıq tekshesi” alıp baradı. 2011-jılı plotina janında “Shımbulaq” taw-lıja orayına aparatuǵın 4,5 kilometr uzınlıqtaǵı tas jolı qurılǵan.
“Medeu” sport kompleksi 1972 jılı qurılǵan bolıp, teńiz qáddinen 1700 metr bálentlikte jaylasqan.
Kompleks muz maydanınıń beti 10,5 mıń kvadrat metr bolıp, bir waqıtta 3 mıńǵa shekem adamdı qabıl ete aladı. Hár jılı oǵan 400 mıńnan aslam miyman baradı.
Búgingi kúnde kompleks sport, turizm hám mádeniyat klasteri sıpatında jumıs islemekte. Sport jarısları, ǵalaba konki ushıw, mádeniy ilajlar, festivallar turaqlı ótkerip kelinbekte.
2011-jılı bul jerde VII qısqı Aziya oyınları, 2017-jılı Pútkil Jer júzilik Universiada jarısları ótkerilgen.
Tanısıw waqtında Ózbekstan hám Qazaqstan Prezidentleri jas figuralı ushıwshılardıń kórgizbeli shıǵıwların tamasha etti.
Soń Ózbekstan Respublikası Prezidenti Shavkat Mirziyoev hám Qazaqstan Respublikası Prezidenti Qasım-Jomart Toqaev Almata qalasında rásmiy emes ushırasıw ótkerdi.
Eki mámleket delegaciyalarınıń qatnasıwında Ózbekstan – Qazaqstan jaqsı qońsıshılıq, strategiyalıq sheriklik hám awqamlaslıq qatnasıqların izbe-iz bekkemlew máseleleri hár tárepleme kórip shıǵıldı.
Sáwbetlesiw aldında mámleket basshıları bir-birin hám tuwısqan xalıqlarımızdı báhár ayyyamı Nawrız hám jaqınlasıp kiyatırǵan Ramazan hayıtı menen qızǵın qutlıqladı.
Ózbekstan menen Qazaqstan arasındaǵı kóp táreplemeli birge islesiw joqarı dárejege kóterilgeni ayrıqsha qanaatlanıwshılıq penen atap ótildi. Barlıq dárejelerde jedel sóylesiwler alıp barılmaqta. Tovar almasıw kólemi jıl basınan berli 14 procentke arttı, ulıwma bahası 4 milliard dollardan aslam investiciya joybarlarınıń portfeli qáliplestirildi, tıǵız aymaqlararalıq qatnasıqlar hám mádeniy-gumanitarlıq almasıw rawajlanbaqta.
Mámleket basshıları Ózbekstan hám Qazaqstan Bas ministrleri orınbasarlarınıń óz-ara sawdanı kóbeytiw, mashina qurılısı, elektrotexnika, neft-gaz, toqımashılıq, awıl xojalıǵı hám basqa tiykarǵı tarmaqlarda jetekshi kárxanalardıń kooperaciya joybarların alǵa qoyıw boyınsha kórilip atırǵan ilajlar haqqındaǵı esabatların tıńladı.
Prezidentler sanaat kooperaciyası boyınsha uzaq múddetli baǵdarlamanı qáliplestiriw, regionallıq áhmiyetke iye infrastrukturalıq joybarlardı jedellestiriw boyınsha anıq tapsırmalar berdi.
Bıyılǵı jılı Xalıqaralıq sanaat kooperaciyasınıń orayın iske qosıw boyınsha ámeliy jumısların baslaw, birgeliktegi sırtqı sawda kompaniyasınıń jumısın keńeytiw áhmiyetli ekenligi atap ótildi.
Regionallıq kún tártibi, sonıń ishinde, jaqın aylarda Ózbekstanda ótkeriletuǵın Oraylıq Aziya sammitlerine tayarlıq boyınsha pikir alısıldı.
Bolajaq eki hám kóp tárepleme ilajlardıń rejesi de kórip shıǵıldı.

Ushırasıw hár waqıttaǵıday doslıq hám issheń ruwxta ótti.
Soń Ózbekstan Respublikası Prezidenti Shavkat Mirziyoev hám Qazaqstan Respublikası Prezidenti Qasım-Jomart Toqaev birgelikte “AlmatyFair.ai” sanlı texnologiyalar hám jasalma intellekt kórgizbesine bardı.
Mámleket basshılarına usı tarawlardaǵı aldınǵı sheshimler hám innovaciyalıq qollanbalar haqqında málimleme berildi.
Qazaqstan Prezidentiniń baslaması menen shólkemlestirilip atırǵan Alem.ai jasalma intellekt orayınıń prezentaciyası bolıp ótti.
Alem.ai – jasalma intellekt tarawında qánigelerdi oqıtıw, startaplardı iske qosıw hám ilimiy izertlewlerdi ámelge asırıw ushın platforma.
Jetekshiler Oraylıq Aziyadaǵı eń iri texnoparkler birlespesi – “Central Asian Innovation Hubs” (“Astana Hub” va “IT Park Uzbekistan”) jumısı menen tanıstı.
Prezidentler sanlastırıw tarawındaǵı óz-ara paydalı birge islesiwdi keńeytiw, birgeliktegi IT ónimlerin jaratıw, jasalma intellekt hám aldınǵı málimleme texnologiyaları tarawındaǵı milliy strategiyalardı óz-ara baylanıstırıw áhmiyetli ekenligin atap ótti.
Ózbekstan Respublikası Prezidenti Shavkat Mirziyoev Almatı qalasına saparınıń mádeniy baǵdarlaması sheńberinde Qazaqstan Respublikası Prezidenti Qasım-Jomart Toqaev penen birgelikte Abılxan Kasteev atındaǵı Milliy kórkem óner muzeyine bardı.
Xalıq xudojnikleri – qazaq súwretlew óneriniń tiykarın salıwshısı Abılxan Kasteev hám ózbek reńli súwret sheberi Oral Tansıqbaevtıń shıǵarmaları tamasha etildi.
Kórgizbe Ózbekstan hám Qazaqstan bay kórkem miyrasınıń jarqın kórinisi, eki tuwısqan xalıq arasındaǵı bekkem mádeniy qatnasıqlardıń simvolı boldı.
Mámleket basshıları kórkem óner tarawındaǵı birge islesiwdi jáne de keńeytiw, sonıń ishinde, birgeliktegi ilajlardı ótkeriw, mádeniy sóylesiwdi rawajlandırıwǵa xızmet etetuǵın baslamalardı qollap-quwatlaw áhmiyetli ekenligin atap ótti.
Sonıń menen Ózbekstan Respublikası Prezidentiniń Qazaqstan Respublikasına ámeliy saparı juwmaqlandı.
Almata xalıqaralıq aeroportında Ózbekstan Respublikası Prezidenti Shavkat Mirziyoevti Qazaqstan Respublikası Prezidenti Qasım – Jomart Toqaev shıǵarıp saldı.

ÓzA