Oliy Majlis Senatına Vengriya mámleketlik audit uyımınıń baslıǵı Laslo Vindish basshılıǵındaǵı delegaciya keldi.
Senat Baslıǵı Tanzila Norbaeva menen ushırasıwda Laslo Vindish Ózbekstandaǵı reformalar, jaqın qońsıshılıq hám xalıqaralıq dárejedegi ashıq hám pragmatikalıq sırtqı siyasattı atap ótti.

Ózbekstan hám Vengriya arasında kóp jıllıq doslıq baylanıslarına hám eki xalıq arasındaǵı qatnasıqlardıń tariyxıy áhmiyetine toqtap ótti.
Eki mámleket jetekshileriniń háreketleri menen rawajlanıp atırǵan strategiyalıq qatnasıqlar hám olardıń perspektivaları dodalandı. Atap aytqanda, sawda, ekonomika hám suw xojalıǵı tarawlarında birge islesiw joybarların jolǵa qoyıw, sonday-aq, hár eki mámlekettiń aymaqları arasında sóylesiwlerdi bunnan bılay da jedellestiriw máselelerine ayrıqsha itibar qaratıldı.
Mámleket dárejesindegi wazıypalardıń orınlanıwın qadaǵalaw máselesinde tájiriybe almasıw hám parlamentleraralıq baylanıslardı rawajlandırıw boyınsha pikir alısıldı.
Ushırasıw juwmaǵında tárepler eki tárepleme birge islesiwdi bunnan bılay da rawajlandırıw hám belgilengen baslamalardı ámelge asırıwǵa tayar ekenin bildirdi.

N.Abduraimova,
ÓzAnıń xabarshısı